ತಾಯಿ ಕೊಂದ ಮಗನಿಗೆ ಜೀವಾವಧಿ ಶಿಕ್ಷೆ

ದಾವಣಗೆರೆ: ಜಮೀನು ವಿಚಾರವಾಗಿ ತಾಯಿಯನ್ನು ಕೊಲೆ ಮಾಡಿದ್ದ ಮಗ ಲೋಕೇಶ ನಾಯ್ಕ (45)ಗೆ 2ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸೆಷನ್ಸ್ ನ್ಯಾಯಾಲಯ ಜೀವಾವಧಿ ಶಿಕ್ಷೆ ಹಾಗೂ ₹3 ಲಕ್ಷ ದಂಡ ವಿಧಿಸಿದೆ. 2023ರ ಅ.10ರಂದು ನೇರ್ಲಿಗೆ ಗ್ರಾಮದಲ್ಲಿ ಶಾಂತಿ ಬಾಯಿ (65) ಅವರನ್ನು ಕೊಲೆ ಮಾಡಲಾಗಿತ್ತು. ಶಾಂತಿ ಬಾಯಿ ಮತ್ತು ಪತಿ ಚಂದ್ರ ನಾಯ್ಕ ಅವರಿಗೆ ಮೂರು ಎಕರೆ ಜಮೀನಿತ್ತು. ಪುತ್ರಿ ಒಂದು ಎಕರೆ ಹಾಗೂ ಪುತ್ರ ಎರಡು ಎಕರೆ ಜಮೀನು ಉಳಿಮೆ ಮಾಡುತ್ತಿದ್ದರು. ಎಲ್ಲ ಜಮೀನನ್ನು ತನ್ನ ಹೆಸರಿಗೆ ಮಾಡಿಕೊಡುವಂತೆ ಲೋಕೇಶ ಆಗಾಗ್ಗೆ ತಾಯಿಯೊಂದಿಗೆ ಗಲಾಟೆ ಮಾಡುತ್ತಿದ್ದ. ಗಲಾಟೆ ವೇಳೆ ಲೋಕೇಶ ಹೆಂಚಿನಿಂದ ತಾಯಿಯ ತಲೆಗೆ ಹೊಡೆದ ಪರಿಣಾಮ ಗಂಭೀರ ಗಾಯಗೊಂಡು ಶಾಂತಿ ಬಾಯಿ ಮೃತಪಟ್ಟಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಧೀಶ ಕೃಷ್ಣಮೂರ್ತಿ ಪಡಸಲಗಿ, ದಂಡದ ₹2.5 ಲಕ್ಷವನ್ನು ಸಂತ್ರಸ್ತರ ಕುಟುಂಬಕ್ಕೆ ನೀಡುವಂತೆ ಆದೇಶಿಸಿದ್ದಾರೆ.