ಭಾರತಕ್ಕೆ ಅಮೆರಿಕಾದಿಂದ ದೀಪಾವಳಿ ಗಿಫ್ಟ್‌…

ವಿಶ್ವದ ದೊಡ್ಡಣ್ಣ ಅಮೆರಿಕಾ, ಭಾರತಕ್ಕೆ ಗುಡ್‌ ನ್ಯೂಸ್‌ ನೀಡಿದೆ. ಇರಾನ್‌ನಿಂದ ತೈಲ ಆಮದು ಮಾಡಿಕೊಳ್ಳದಂತೆ ಹೇರಿದ್ದ ನಿರ್ಬಂಧವನ್ನು ತಾತ್ಕಾಲಿಕವಾಗಿ ಸಡಿಲಗೊಳಿಸಿದೆ. ಭಾರತವಲ್ಲದೆ, ನಿರ್ಬಂಧದಿಂದ ತೆರವುಗೊಳಿಸಿರುವ ಒಟ್ಟು 8 ರಾಷ್ಟ್ರಗಳ ಪಟ್ಟಿಯನ್ನು ಅಮೆರಿಕಾದ ವಿದೇಶಾಂಗ ಕಾರ್ಯದರ್ಶಿ ಮೈಕ್‌ ಪ್ಯಾಂಪೊ ಬಿಡುಗಡೆಗೊಳಿಸಿದ್ದಾರೆ. ಚೀನಾ, ಜಪಾನ್‌, ಇಟಲಿ, ಗ್ರೀಸ್‌, ಸೌಥ್‌ ಕೊರಿಯಾ, ಟರ್ಕಿ ಪಟ್ಟಿಯಲ್ಲಿ ಸೇರಿವೆ. ಈ ಕುರಿತು ಮಾತನಾಡಿರುವ ಪ್ಯಾಂಟೊ, ಇರಾನ್ ಆಡಳಿತದ ನಡವಳಿಕೆಯನ್ನು ಬದಲಿಸುವ ಉದ್ದೇಶದಿಂದ ಯುಎಸ್ ಈ ರೀತಿಯ ಕಠಿಣವಾದ ನಿರ್ಬಂಧಗಳನ್ನು ವಿಧಿಸಿದೆ. ಇನ್ನು ಈ ನಿರ್ಬಂಧಗಳು ಇರಾನ್​ನ ಬ್ಯಾಂಕಿಂಗ್ ಮತ್ತು ಇಂಧನ ಕ್ಷೇತ್ರಗಳ ಮೇಲೂ ಪರಿಣಾಮ ಬೀರಲಿದೆ ಎಂದರು. ನವೆಂಬರ್ 4ರ ವೇಳೆಗೆ ಇರಾನ್ನಿಂದ ತೈಲ ಖರೀದಿಗಳನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲು ಅಮೆರಿಕ ಬಯಸಿದ್ದರೂ, ತೈಲ ಮಾರುಕಟ್ಟೆಯ ಮೇಲಾಗುವ ಹಾನಿಯನ್ನು ಪರಿಗಣಿಸಿ ನಿರ್ಬಂಧದ ಮೇಲೆ ಸಡಿಲತೆ ನೀಡಲಾಗಿದೆ ಎಂದರು.