ಡಾಬಾದಲ್ಲಿ ಗಾಂಜಾ ಜಪ್ತಿ; ಇಬ್ಬರ ಬಂಧನ

ಕುಷ್ಟಗಿ: ಇಲ್ಲಿಯ ರಾಷ್ಟ್ರೀಯ ಹೆದ್ದಾರಿಯಲ್ಲಿರುವ ಮಹಾರಾಜಾ ಡಾಬಾದಲ್ಲಿ ಗಾಂಜಾ ಸಂಗ್ರಹ ಮತ್ತು ಮಾರಾಟಕ್ಕೆ ಸಂಬಂಧಿಸಿದಂತೆ ಇಬ್ಬರನ್ನು ಬಂಧಿಸಲಾಗಿದೆ. ₹ 50 ಸಾವಿರ ಮೌಲ್ಯದ ಗಾಂಜಾ ಜಪ್ತಿ ಮಾಡಲಾಗಿದ್ದು ಡಾಬಾ ಮಾಲೀಕರಾದ ಅಶೋಕ ಚೌಧರಿ ಮತ್ತು ತೇಜರಾಮ್ ಚೌಧರಿ ಇವರನ್ನು ಬಂಧಿಸಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದ ಇನ್ನೊಬ್ಬ ಆರೋಪಿ ರಣಜಿತ್‌ ಸಿಂಗ್‌ ಪರಾರಿಯಾಗಿದ್ದಾನೆ. ಕಡೆಕೊಪ್ಪ ಸೀಮಾಂತರದಲ್ಲಿರುವ ಡಾಬಾದಲ್ಲಿ ಅಕ್ರಮವಾಗಿ ಗಾಂಜಾ ಸಂಗ್ರಹಿಸಿದ್ದಲ್ಲದೇ ಗ್ರಾಹಕರಿಗೆ ಮಾರಾಟ ಮಾಡುತ್ತಿದ್ದ ಮಾಹಿತಿಯ ಮೇರೆಗೆ ಪಿಎಸ್‌ಐ ಹನುಮಂತಪ್ಪ ತಳವಾರ ಮತ್ತು ಸಿಬ್ಬಂದಿ ಶನಿವಾರ ದಾಳಿ ನಡೆಸಿದ್ದರು. ಬಂಧಿತ ಆರೋಪಿಗಳು ಪರಾರಿಯಾಗಿರುವ ಆರೋಪಿ ರಣಜಿತ್‌ ಸಿಂಗ್‌ನಿಂದ ಗಾಂಜಾ ಖರೀದಿಸುತ್ತಿದ್ದರು ಎಂದು ತಿಳಿಸಲಾಗಿದೆ. ಈ ಕುರಿತ ಪ್ರಕರಣ ಇಲ್ಲಿ ಪೊಲೀಸ್‌ ಠಾಣೆಯಲ್ಲಿ ದಾಖಲಾಗಿದೆ.