8 ತಿಂಗಳ ಗರ್ಭಿಣಿ ಶಂಕಾಸ್ಪದ ಸಾವು: ಪತಿ ಕಿರುಕುಳ ಆರೋಪ

ಆನೇಕಲ್‌: ಕುಡಿತದ ಚಟಕ್ಕೆ ದಾಸನಾಗಿದ್ದ ಪತಿಯ ಕಿರುಕುಳಕ್ಕೆ ಬೇಸತ್ತು 8 ತಿಂಗಳ ಗರ್ಭಿಣಿಯೊಬ್ಬಳು ಅನುಮಾನಾಸ್ಪದವಾಗಿ ಸಾವನ್ನಪ್ಪಿರುವ ಘಟನೆ ತಾಲೂಕಿನ ಹಳೆ ಚಂದಾಪುರದಲ್ಲಿ ನಡೆದಿದೆ. ಮೃತಳನ್ನು ನೇಪಾಳ ಮೂಲದ ಸವಿತಾ (28) ಎಂದು ಗುರುತಿಸಲಾಗಿದೆ. ಪತಿ ಹೇಮರಾಜು (32) ಮತ್ತು 2 ವರ್ಷದ ಗಂಡು ಮಗುವಿನೊಂದಿಗೆ ಕಳೆದ 4 ವರ್ಷಗಳಿಂದ ಇಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದರು. ಹೇಮರಾಜ್‌ ಖಾಸಗಿ ಕಂಪನಿಯಲ್ಲಿ ಸೆಕ್ಯುರಿಟಿ ಗಾರ್ಡ್‌ ಆಗಿದ್ದು, ಸವಿತಾ ಮನೆಗೆಲಸ ಮಾಡುತ್ತಿದ್ದರು. ಜಗಳದ ಬಳಿಕ ನೇಣಿಗೆ ಶರಣು ಆಗಿರ ಬಹುದು ಎನ್ನಲಾಗಿದೆ. ಪೊಲೀಸರ ಮಾಹಿತಿ ಪ್ರಕಾರ ಶುಕ್ರವಾರ ರಾತ್ರಿ ಕುಡಿತದ ವಿಚಾರಕ್ಕೆ ಪತಿ-ಪತ್ನಿ ನಡುವೆ ಗಲಾಟೆ ನಡೆದಿದೆ. ಇದಾದ ಕೆಲ ಹೊತ್ತಿನಲ್ಲಿ ಸವಿತಾ ಮನೆಯ ಕೊಠಡಿಯಲ್ಲಿ ಫ್ಯಾನ್‌ಗೆ ದುಪ್ಪಟ್ಟದಿಂದ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಗಲಾಟೆಯ ಬಳಿಕ ಹೊರಗೆ ಹೋಗಿದ್ದೆ, ವಾಪಸ್‌ ಬಂದು ನೋಡಿದಾಗ ಈ ರೀತಿ ಆಗಿತ್ತು ಎಂದು ಪತಿ ಹೇಮರಾಜ್‌ ಪೊಲೀಸರಿಗೆ ಹೇಳಿಕೆ ನೀಡಿದ್ದಾರೆ. ಪತಿಯ ಹೇಳಿಕೆಯನ್ನು ಒಪ್ಪದ ಮೃತರ ಸಂಬಂಧಿಕರು ಪತಿಯ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾರೆ.