ಬುಲಂದಶಹರ್​ ಇನ್ಸ್​​ಪೆಕ್ಟರ್​ ಸುಭೋದ್ ಹತ್ಯೆ ಪ್ರಕರಣಕ್ಕೆ ಟ್ವಿಸ್ಟ್​, ಯೋಧ ಅರೆಸ್ಟ್​

ಜಮ್ಮು: ಬುಲಂದಶಹರದಲ್ಲಿ ಇತ್ತೀಚೆಗೆ ನಡೆದ ಪೊಲೀಸ್​ ಇನ್ಸ್​​ಪೆಕ್ಟರ್​ ಸುಭೋದ್ ಕುಮಾರ್​​​ ಸಿಂಗ್​ ಹತ್ಯೆ ಪ್ರಕರಣಕ್ಕೆ ಟ್ವಿಸ್ಟ್​ ಸಿಕ್ಕಿದ್ದು, ಇನ್ಸ್​​ಪೆಕ್ಟರ್​ ಸುಭೋದ್​ ಅವರನ್ನು ಹತ್ಯೆ ಮಾಡಿದ ಆರೋಪದ ಮೇಲೆ ಜಮ್ಮುವಿನ ಸೊಪೋರ್​​​ನಲ್ಲಿ ಯೋಧರೊಬ್ಬರನ್ನು ಬಂಧಿಸಲಾಗಿದೆ.ಸೊಪೋರ್​​​ನಲ್ಲಿರುವ 22 ರಾಷ್ಟ್ರೀಯ ರೈಫಲ್ಸ್​ ಸೇನಾ ಶಿಬಿರದಲ್ಲಿ ಕರ್ತವ್ಯದಲ್ಲಿದ್ದ ಜಿತೇಂದ್ರ ಮಲಿಕ್​ ಅಲಿಯಾಸ್​​ ಜೀತು ಫೌಜಿ ಬಂಧಿತ ಯೋಧ. ಜಿತೇಂದ್ರ ಮಲಿಕ್​ನನ್ನು ಶೀಘ್ರವೇ ಉತ್ತರ ಪ್ರದೇಶ ಪೊಲೀಸರಿಗೆ ಒಪ್ಪಿಸಲಾಗುವುದು ಎಂದು ಮೂಲಗಳು ತಿಳಿಸಿವೆ. ಇನ್ಸ್​​ಪೆಕ್ಟರ್​ ಸುಭೋದ್​ ಅವರನ್ನು ಹತ್ಯೆ ಮಾಡಿದ ತಕ್ಷಣ, ಆರೋಪಿ ಯೋಧ ಜಮ್ಮುವಿನಲ್ಲಿರುವ ತನ್ನ ಕಾರ್ಯಸ್ಥಾನ ತಲುಪಿಕೊಂಡಿದ್ದ ಎಂದು ತಿಳಿದುಬಂದಿದೆ.ಬುಲಂದಶಹರ ಹಿಂಸಾಚಾರದಲ್ಲಿ ಇನ್ಸ್​​ಪೆಕ್ಟರ್​ ಸುಭೋದ್ ಹಾಗೂ ಪದವೀಧರ ಯುವಕನೊಬ್ಬನ ಹತ್ಯೆಯಾಗಿತ್ತು. ಇಬ್ಬರನ್ನೂ .32 ಬೋರ್​ ಪಿಸ್ತೂಲ್​​ನಿಂದಲೇ ಹತ್ಯೆ ಮಾಡಲಾಗಿದೆ ಎಂದು ವಿಶೇಷ ತನಿಖಾ ತಂಡ ವರದಿ ನೀಡಿತ್ತು. ಈ ಪಿಸ್ತೂಲ್ ಬಂಧಿತ ಯೋಧ ಜಿತೇಂದ್ರಗೆ ಸೇರಿದ್ದೆಂದು ಪೊಲೀಸರು ಶಂಕಿಸಿದ್ದಾರೆ. ಬುಲಂದಶಹರ್​​ ಹಿಂಸಾಚಾರದ ವೇಳೆ ವಿಡಿಯೋಗಳನ್ನ ಪರಿಶೀಲಿಸಲಾಗಿ ಯೋಧ ಜಿತೇಂದ್ರ ಮಲಿಕ್ ಘಟನಾ ಸ್ಥಳದಲ್ಲಿ ಇರುವುದು ಕಂಡುಬಂದಿತ್ತು ಎಂದು ಎಸ್​​ಐಟಿ ಪೊಲೀಸರು ನಿನ್ನೆ ಹೇಳಿದ್ದರು.ಪೋಸ್ಟ್​ ಮಾರ್ಟಮ್​ ವರದಿ ಪ್ರಕಾರ ಗುಂಡು ಇನ್ಸ್​​ಪೆಕ್ಟರ್​ ಸುಭೋದ್ ಅವರ ತಲೆಬುರುಡೆಗೆ ಮುಂದಿನ ಹೊಕ್ಕಿದ್ದು, ಆ ಗುಂಡು ತಲೆಯ ಹಿಂಭಾಗದಲ್ಲಿಯೇ ಉಳಿದಿತ್ತು. ಇದರ ಜೊತೆಗೆ ನಾಲ್ಕಾರು ಕಲ್ಲಿನ ಏಟುಗಳೂ ಅವರ ದೇಹದ ಬಿದ್ದಿದ್ದವು.