ಕಾಮಗಾರಿಗೆ ಇರಿಸಿದ್ದ ಪೈಪ್ ಬಡಿದು 6 ವರ್ಷದ ಬಾಲಕ ಸಾವು

ಹಾವೇರಿ: ನೀರು ಸರಬರಾಜು ಕಾಮಗಾರಿಗೆ ಇರಿಸಿದ್ದ ಪೈಪ್ ಬಡಿದು 6 ವರ್ಷದ ಬಾಲಕ ಸಾವನ್ನಪ್ಪಿದ ಘಟನೆ ಹಾವೇರಿ ಜಿಲ್ಲೆ ಹಾನಗಲ್ ಪಟ್ಟಣದ ಹೊರ ವಲಯದಲ್ಲಿ ನಡೆದಿದೆ.‌ಮೃತ ಬಾಲಕನನ್ನು ಮಹ್ಮದ್ ಎಂದು ಗುರುತಿಸಲಾಗಿದೆ.

ಯೂಸೂಫ್​ ತಮ್ಮ ಮಗ ಮಹ್ಮದ್‌ನನ್ನು ಕರೆದುಕೊಂಡು ಬೈಕ್​ನಲ್ಲಿ ಪಯಾಣಿಸುತ್ತಿದ್ದರು. ಈ ಸಂದರ್ಭದಲ್ಲಿ ಎದುರಿಗೆ ಬರುತ್ತಿದ್ದ ಟಿಪ್ಪರ್ ಲಾರಿ ಗಮನಿಸಿ ರಸ್ತೆ ಪಕ್ಕದಲ್ಲಿ ನಿಂತಿದ್ದಾರೆ. ಈ ವೇಳೆ ಚಾಲಕನ ನಿಯಂತ್ರಣ ತಪ್ಪಿದ ಟಿಪ್ಪರ್ ರಸ್ತೆ ಬದಿ ಇರಿಸಿದ್ದ ಪೈಪ್‌ಗೆ ಡಿಕ್ಕಿ ಹೊಡೆದಿದೆ. ರಸ್ತೆ ಬದಿ ಬೈಕ್‌ನಲ್ಲಿದ್ದ ತಂದೆ ಮಗನಿಗೆ ಪೈಪ್ ಬಡಿದ ಪರಿಣಾಮ ಮಹ್ಮದ್ ಸ್ಥಳದಲ್ಲಿ ಸಾವನ್ನಪ್ಪಿದ್ದಾನೆ. ಯೂಸೂಫ್ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ. ಹಾನಗಲ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.