ಶಿವಮೊಗ್ಗದಲ್ಲಿ ಮೊಟ್ಟಮೊದಲ ರಾಜ್ಯ ಮಟ್ಟದ ಬಾಕ್ಸಿಂಗ್ ಕ್ರೀಡಾಕೂಟ ಆಯೋಜನೆ

ಶಿವಮೊಗ್ಗ: ನಗರದಲ್ಲಿ ಮೊಟ್ಟಮೊದಲ ಬಾರಿಗೆ ಶಾಲಾ ಶಿಕ್ಷಣ(ಪದವಿ ಪೂರ್ವ) ಇಲಾಖೆಯು 2024-25 ನೇ ಸಾಲಿನ ರಾಜ್ಯಮಟ್ಟದ ಪದವಿಪೂರ್ವ ಕಾಲೇಜುಗಳ ಬಾಕ್ಸಿಂಗ್ ಕ್ರೀಡಾಕೂಟವನ್ನು ದಿನಾಂಕ 21 ಮತ್ತು 22 ರಂದು ನೆಹರು ಒಳಾಂಗಣ ಕ್ರೀಡಾಂಗಣದಲ್ಲಿ ಆಯೋಜಿಸಿದೆ.
ಇದಕ್ಕೆ ಅವಶ್ಯಕತೆ ಇರುವ ಬಾಕ್ಸಿಂಗ್ ರಿಂಗ್ ಅನ್ನು ಕರ್ನಾಟಕ ಅಮೆಚೂರ್ ಬಾಕ್ಸಿಂಗ್ ಅಸೋಸಿಯೇಷನ್(ಕಾಬಾ) ಬೆಂಗಳೂರು ಇವರು ಶಿವಮೊಗ್ಗ ಜಿಲ್ಲೆಗೆ ಒದಗಿಸಿರುತ್ತಾರೆ.
ಕರ್ನಾಟಕದಲ್ಲಿ ಮೊಟ್ಟ ಮೊದಲ ಬಾರಿಗೆ ಅತ್ಯಾಧುನಿಕ ಅಂತರಾಷ್ಟ್ರೀಯ ಮಾದರಿಯ ಬಾಕ್ಸಿಂಗ್ ರಿಂಗ್ ಇದಾಗಿರುತ್ತದೆ. ಸುಮಾರು ಹತ್ತು ಲಕ್ಷಗಳ ವೆಚ್ಚದ ಅತ್ಯಾಧುನಿಕ ಹೊಸ ಬಾಕ್ಸಿಂಗ್ ರಿಂಗ್ ಅನ್ನು ಕಾಬಾದವರು ಶಿವಮೊಗ್ಗ ಜಿಲ್ಲೆಗೆ ಒದಗಿಸಿರುತ್ತಾರೆ.
ಕೇವಲ ಮೂರು ಜಿಲ್ಲೆಗಳಲ್ಲಿ ಮಾತ್ರ ಬಾಕ್ಸಿಂಗ್ ರಿಂಗ್ ಇದ್ದು, ಶಿವಮೊಗ್ಗದ ನೂತನ ರಿಂಗ್ ಅಂತರಾಷ್ಟ್ರೀಯ ಮಟ್ಟದಾಗಿರುತ್ತದೆ. ಈ ಬಾಕ್ಸಿಂಗ್ ಕ್ರೀಡಾಕೂಟದಲ್ಲಿ ರಾಜ್ಯದ ಎಲ್ಲಾ ಜಿಲ್ಲೆಗಳ ಪದವಿ ಪೂರ್ವ ಕಾಲೇಜುಗಳಿಂದ ಸುಮಾರು 150 ಕ್ರೀಡಾಳುಗಳು ಭಾಗವಹಿಸಿದ್ದಾರೆ. 19 ವರ್ಷ ದೊಳಗಿನ 46 ಕೆಜಿಯಿಂದ 95 ಕೆಜಿ ವರೆಗಿನ 11 ವಿಭಾಗಗಳಲ್ಲಿ ಬಾಲಕರು ಮತ್ತು 12 ವಿಭಾಗಗಳಲ್ಲಿ ಬಾಲಕಿಯರು ಭಾಗವಹಿಸಲಿದ್ದಾರೆ.