ಕೆಮ್ಮು ಸಿರಪ್‌ ಕೇಸ್‌: ಕೋಲ್ಡ್‌ರಿಫ್‌ ಮಾಲಕನ ಆಸ್ತಿ ಜಪ್ತಿ

ಮಧ್ಯಪ್ರದೇಶದಲ್ಲಿ ಕನಿಷ್ಠ 20 ಮಕ್ಕಳ ಸಾವಿಗೆ ಕಾರಣವಾದ ಕೋಲ್ಡ್‌ರಿಫ್‌ ಕೆಮ್ಮಿನ ಸಿರಪ್‌ ತಯಾರಕ ಶ್ರೀಸನ್‌ ಫಾರ್ಮಾದ ಪ್ರವರ್ತಕ ಜಿ. ರಂಗನಾಥನ್‌ಗೆ ಸೇರಿದ 2.04 ಕೋಟಿ ರೂ. ಮೌಲ್ಯದ ಚೆನ್ನೈನ 2 ಫ್ಲಾಟ್‌ಗಳನ್ನು ಇ.ಡಿ. ಜಪ್ತಿ ಮಾಡಿದೆ. ಹಣಕಾಸು ಅಕ್ರಮಗಳ ತಡೆ ಕಾಯ್ದೆಯಡಿ ಕಾನೂನು ಕ್ರಮ ಜರಗಿಸಿರುವ ಇ.ಡಿ., ತಮಿಳುನಾಡಿನ ಕೊಡಂಬಾಕಂನಲ್ಲಿ ಆಸ್ತಿಗಳನ್ನು ಜಪ್ತಿ ಮಾಡಿದೆ.ಈ ಆಸ್ತಿಗಳು ರಂಗನಾಥನ್‌ ಮತ್ತವರ ಕುಟುಂಬ ಸದಸ್ಯರಿಗೆ ಸೇರಿದ್ದಾಗಿದೆ ಎಂದು ಇ.ಡಿ. ತಿಳಿಸಿದೆ. ರಂಗನಾಥನ್‌ರನ್ನು ಅಕ್ಟೋಬರ್‌ನಲ್ಲಿ ಮಧ್ಯಪ್ರದೇಶ ಪೊಲೀಸರು ಬಂಧಿಸಿದ್ದರು. ಕಂಪೆನಿಯು ಔಷಧ ತಯಾರಿಕೆಗೆ ಕೈಗಾರಿಕ ದರ್ಜೆಯ ಕಚ್ಚಾ ವಸ್ತುಗಳನ್ನು ಬಳಸಿ ಅಗ್ಗದ ಉತ್ಪಾದನೆ ಮಾಡಿ ಲಾಭ ಗಳಿಸುತ್ತಿತ್ತು ಎಂದು ಇ.ಡಿ. ಆರೋಪಿಸಿದೆ.