ರೋಡ್ ರೇಜ್; ಮಹಿಳೆಗೆ ನಿಂದಿಸಿ ಕಾರು ಜಖಂಗೊಳಿಸಿದ್ದ ಕಿಡಿಗೇಡಿಗಳ ಬಂಧನ!-

ಬೆಂಗಳೂರು: ಕೋರಮಂಗಲದ ಬಿಡಿಎ ಕಾಂಪ್ಲೆಕ್ಸ್ ಬಳಿ ಕಾರಿಗೆ ದ್ವಿಚಕ್ರ ವಾಹನ ಡಿಕ್ಕಿ ಹೊಡೆದ ವಿಚಾರವಾಗಿ ಪ್ರಶ್ನಿಸಿದ ಮಹಿಳೆಯ ಕಾರಿನ ಗಾಜು ಒಡೆದು, ಕಲ್ಲಿನಿಂದ ಹಾನಿಗೊಳಿಸಿದ ಮೂವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಅಕ್ಟೋಬರ್ 28ರಂದು ಮಹಿಳೆಯ ಕಾರಿಗೆ ಮೂವರು ಯುವಕರಿದ್ದ ಬೈಕ್ ಡಿಕ್ಕಿ ಹೊಡೆದಿತ್ತು. ಎಚ್ಚರಿಕೆಯಿಂದ ವಾಹನ ಚಲಾಯಿಸುವಂತೆ ಹೇಳಿದ್ದಕ್ಕೆ ಕೋಪಗೊಂಡ ಯುವಕರು ಮಹಿಳೆಯೊಂದಿಗೆ ಜಗಳವಾಡಿ, ಹೆಲ್ಮೆಟ್ ಹಾಗೂ ಕಲ್ಲಿನಿಂದ ಕಾರಿನ ಗಾಜು, ಬಾನೆಟ್ ಮತ್ತು ರಿಯರ್ ವ್ಯೂ ಮಿರರ್ ಜಖಂಗೊಳಿಸಿದ್ದಾರೆ. ಇದರಿಂದ ₹15ರಿಂದ ₹20 ಸಾವಿರ ನಷ್ಟವಾಗಿದೆ. ಮಹಿಳೆ ನೀಡಿದ ದೂರಿನ ಮೇರೆಗೆ ಕೋರಮಂಗಲ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು, ಸಿಸಿಟಿವಿ ಹಾಗೂ ವಿಡಿಯೋ ದೃಶ್ಯಾವಳಿಗಳ ಆಧಾರದ ಮೇಲೆ ಮೂವರನ್ನು ಬಂಧಿಸಿದ್ದಾರೆ. ಆರೋಪಿಗಳ ವಿರುದ್ಧ ಬಿಎನ್‌ಎಸ್ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ.