ಭಿಲಾಯಿ ಉಕ್ಕು ಘಟಕದಲ್ಲಿ ಸ್ಫೋಟ: 9 ಕಾರ್ಮಿಕರ ಸಜೀವ ದಹನ..

ರಾಯ್​ಪುರ (ಛತ್ತೀಸ್‍ಗಢ): ಇಲ್ಲಿನ ಭಿಲಾಯಿ ಉಕ್ಕು ಉತ್ಪಾದನಾ ಘಟಕದಲ್ಲಿ ಅನಿಲ ಕೊಳವೆ ಮಾರ್ಗದಲ್ಲಿ ಸ್ಫೋಟ ಸಂಭವಿಸಿದ್ದು, 9 ಮಂದಿ ಕಾರ್ಮಿಕರು ಅಸುನೀಗಿದ್ದಾರೆ. 11 ಮಂದಿ ತೀವ್ರವಾಗಿ ಗಾಯಗೊಂಡಿದ್ದಾರೆ.

ಭಿಲಾಯಿ ಪಟ್ಟಣದಲ್ಲಿರುವ ಕಲ್ಲಿದ್ದಲು ಕುಲುಮೆಯಲ್ಲಿ ಇಂದು ಮಧ್ಯಾಹ್ನ ಸ್ಫೋಟ ಉಂಟಾಗಿದೆ ಎಂದು ವರದಿಗಳು ತಿಳಿಸಿವೆ. ಪೊಲೀಸರು ಮತ್ತು ಭಾರಿ ಸಂಖ್ಯೆಯಯಲ್ಲಿ ಅಗ್ನಿಶಾಮಕ ಸಿಬ್ಬಂದಿ ಸ್ಥಳಕ್ಕೆ ದೌಡಾಯಿಸಿದ್ದಾರೆ. 6 ಮಂದಿ ಸ್ಥಿತಿ ಗಂಭೀರವಾಗಿದ್ದು, ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸರಕಾರಿ ಸ್ವಾಮ್ಯದ ಭಾರತೀಯ ಉಕ್ಕು ಪ್ರಾಧಿಕಾರ (SAIL) ಭಿಲಾಯಿ ಉಕ್ಕು ಘಟಕವನ್ನು ನಿರ್ವಹಿಸುತ್ತದೆ.

ಭಾರತೀಯ ರೈಲ್ವೇಗೆ ವಿಶ್ವ ದರ್ಜೆಯ ರೈಲ್​​ಗಳನ್ನು ಸರಬರಾಜು ಮಾಡುವ ಏಕೈಕ ಉತ್ಪಾದನಾ ಘಟಕ ಇದಾಗಿದೆ. 260 ಮೀಟರ್​ ಉದ್ದನೆಯ rail ಗಳು ಇಲ್ಲಿ ತಯಾರಾಗುತ್ತವೆ. ಜೊತೆಗೆ ಇನ್ನೂ ಅನೇಕ ಮಾದರಿಗಳ ಹೆವಿ ಡ್ಯೂಟಿ ಸ್ಟೀಲ್​ ಪ್ರಾಡಕ್ಟ್​​ಗಳು ಇಲ್ಲಿ ತಯಾರಾಗುತ್ತವೆ. ಘಟಕವು ವಾರ್ಷಿಕ 3.153 ಮೆಟ್ರಿಕ್​ ಟನ್​ ಉತ್ಪಾದನಾ ಸಾಮರ್ಥ್ಯ ಹೊಂದಿದೆ.