ಮಣಿಯಂಪಾರೆ ಯುವಕ ಮಸ್ಕತ್ ನಲ್ಲಿ ಸಾವು

ಮಸ್ಕತ್ ನಲ್ಲಿ ಶುಕ್ರವಾರ (ಡಿ.5) ಈಜಲೆಂದು ತೆರಳಿದ ಸಂದರ್ಭ ಸಂಭವಿಸಿದ ಘಟನೆಯಲ್ಲಿ ಕಾಸರಗೋಡು ಜಿಲ್ಲೆಯ ಶೇಣಿ ಮಣಿಯಂಪಾರೆ ಕಂಗಿನಮೂಲೆ ನಿವಾಸಿ ಆಶಿಖ್ (21) ಮೃತಪಟ್ಟಿದ್ದಾರೆ.ಮಸ್ಕತ್ ನ ಸುಂದರ ನಿಸರ್ಗ ತಾಣ ವಾಡಿಶಾಬ್ ನಲ್ಲಿ ಈ ಘಟನೆ ಸಂಭವಿಸಿದೆ.ಆಶಿಖ್ ಅವರು ರಜಾ ದಿನವಾದ್ದರಿಂದ ಸ್ನಾನ ಮತ್ತು ನೀರಾಟಕ್ಕೆ ಗೆಳೆಯರ ಜತೆಗೆ ಇಲ್ಲಿಗೆ ಬಂದಿದ್ದರು. ಮೇಲ್ಗಡೆಯಿಂದ ಹರಿವ ನೀರಿಗೆ ಹಾರುವಾಗ ತಲೆ ಬಂಡೆಗೆ ಬಡಿದು ಮೃತಪಟ್ಟರೆಂದು ಮಾಹಿತಿ ಲಭಿಸಿದೆ. ಮೃತದೇಹವನ್ನು ಊರಿಗೆ ತಲುಪಿಸಲು ಪ್ರಯತ್ನಗಳು ನಡೆಯುತ್ತಿವೆ. ಆರು ತಿಂಗಳ ಹಿಂದೆಯಷ್ಟೇ ಸೂಪರ್ ಮಾರ್ಕೆಟ್ ಸಿಬಂದಿಯಾಗಿ ಉದ್ಯೋಗಕ್ಕೆ ಇವರು ತೆರಳಿದ್ದರು. ಈ ಹುಡುಗನ ತಾಯಿ ಸುಬೈದಾ ನಾಲ್ಕು ವರ್ಷದ ಹಿಂದೆ ವಾಹನ ಅಪಘಾತದಲ್ಲಿ ಮೃತಪಟ್ಟಿದ್ದರು. ಮೃತ ಯುವಕ ತಂದೆ, ಸೋದರ- ಸೋದರಿಯರನ್ನು ಅಗಲಿದ್ದಾರೆ.