ಬೆಂಗಳೂರು: ಕೊಲೆಗೆ ಯತ್ನಸಿದ ಮೂವರು ಆರೋಪಿಗಳು ಸೆರೆ

ಅಗ್ರಹಾರದ ದಾಸರಹಳ್ಳಿ ರಸ್ತೆಯಲ್ಲಿ ಸಂತೋಷ್‌ ಎಂಬುವವರ ಮೇಲೆ ಮಾರಕಾಸ್ತ್ರಗಳಿಂದ ದಾಳಿ ನಡೆಸಿ ಕೊಲೆಗೆ ಯತ್ನಿಸಿದ್ದ ಮೂವರನ್ನು ಮಾಗಡಿ ರಸ್ತೆ ಠಾಣೆಯ ಪೊಲೀಸರು ಬಂಧಿಸಿದ್ದಾರೆ. ಎಸ್‌.ಮಂಜುನಾಥ್‌, ಶರತ್‌ ಕುಮಾರ್ ಹಾಗೂ ಸುರೇಶ್‌ ಬಂಧಿತರು. ಮಾರ್ಚ್ 9ರಂದು ಕೃತ್ಯ ಎಸಗಿದ್ದರು. ‘ಹಳೆಯ ದ್ವೇಷದ ಕಾರಣಕ್ಕೆ ಆರೋಪಿಗಳು ಕೃತ್ಯ ಎಸಗಿದ್ದಾರೆ ಎಂದು ಪ್ರಾಥಮಿಕ ವಿಚಾರಣೆಯಿಂದ ಗೊತ್ತಾಗಿದೆ. ಸಂತೋಷ್‌ ಸ್ಥಿತಿ ಗಂಭೀರ ವಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ’ ಎಂದು ಪೊಲೀಸರು ಹೇಳಿದರು. ‘ಸಂತೋಷ್‌ ಮೇಲೆ ಕೊಲೆ ಆರೋಪ ಇತ್ತು. ಕಾರು ವಿಚಾರಕ್ಕೆ ತನ್ನ ಸ್ನೇಹಿತ ಜತೆಗೆ ಸಂತೋಷ್ ಗಲಾಟೆ ಮಾಡಿಕೊಂಡಿದ್ದರು. 2024ರಲ್ಲಿ ಸ್ನೇಹಿತನ ಕೊಲೆ ನಡೆದಿತ್ತು. ಆ ಪ್ರಕರಣದಲ್ಲಿ ಸಂತೋಷ್‌ ಅವರನ್ನು ಪೊಲೀಸರು ಬಂಧಿಸಿದ್ದರು. ಜಾಮೀನಿನ ಮೇಲೆ ನಾಲ್ಕು ತಿಂಗಳ ಹಿಂದೆ ಜೈಲಿನಿಂದ ಬಿಡುಗಡೆ ಆಗಿದ್ದರು. ಕೊಲೆಯಾದ ವ್ಯಕ್ತಿಯ ಕಡೆ ಯವರು ಸಂತೋಷ್ ಮೇಲೆ ದ್ವೇಷ ಸಾಧಿಸುತ್ತಿದ್ದರು. ಮಾರ್ಚ್‌ 9ರಂದು ಅಗ್ರಹಾರದ ದಾಸರಹಳ್ಳಿ ರಸ್ತೆಯಲ್ಲಿ ಸಂತೋಷ್ ಸಾಗುವಾಗ ಅಡ್ಡಗಟ್ಟಿ ಕೊಲೆಗೆ ಯತ್ನಿಸಿದ್ದರು’ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.