ಲಂಚ: ಲೋಕಾಯುಕ್ತರ ಬಲೆಗೆ ಇಬ್ಬರು ಪೊಲೀಸರು

ಕೊಪ್ಪಳ: ಠಾಣೆ ಜಾಮೀನು ನೀಡಲು ಲಂಚ ಪಡೆದ ಆರೋಪದ ಮೇಲೆ ಇಲ್ಲಿನ ನಾಗರಿಕ ಹಕ್ಕು ಜಾರಿ ನಿರ್ದೇಶನಾಲಯ (ಡಿಸಿಆರ್‌ಇ) ಇಬ್ಬರು ಪೊಲೀಸ್‌ ಸಿಬ್ಬಂದಿಯನ್ನು ಲೋಕಾಯುಕ್ತರು ಶನಿವಾರ ಬಂಧಿಸಿದ್ದಾರೆ. ಅಟ್ರಾಸಿಟಿ ಪ್ರಕರಣವೊಂದಕ್ಕೆ ಜಾಮೀನು ನೀಡಲು ಫೋನ್‌ ಪೇ ಮೂಲಕ ಪೊಲೀಸ್‌ ಸಿಬ್ಬಂದಿ ಚಂದಾಲಿಂಗ ₹15 ಸಾವಿರ ಮತ್ತು ಮಾರುತಿ ₹3 ಸಾವಿರ ಲಂಚ ಪಡೆದುಕೊಂಡಿದ್ದಾರೆ ಎಂದು ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಲಾಗಿತ್ತು. ಇದರನ್ವಯ ದಾಳಿ ನಡೆಸಿ ಪೊಲೀಸರನ್ನು ಬಂಧಿಸಲಾಗಿದೆ. ಲೋಕಾಯುಕ್ತ ಎಸ್‌.ಪಿ. ಸಿದ್ದರಾಜು ಸಿ., ಮಾರ್ಗದರ್ಶನದಲ್ಲಿ ಡಿವೈಎಸ್‌ಪಿ ಲೋಕೇಶ ನೇತೃತ್ವದಲ್ಲಿ ಅಧಿಕಾರಿಗಳ ತಂಡ ಈ ಬಲೆ ಬೀಸಿತ್ತು. ಲೋಕಾಯುಕ್ತ ಇನ್‌ಸ್ಟೆಕ್ಟರ್‌ಗಳಾದ ಸುನೀಲ್‌, ಚಂದ್ರಪ್ಪ ಹಾಗೂ ಸಿಬ್ಬಂದಿ ಶೈಲಾ ಎಸ್‌. ಪ್ಯಾಟಿಶೆಟ್ಟರ್‌ ಕಾರ್ಯಾಚರಣೆ ತಂಡದಲ್ಲಿ ಪಾಲ್ಗೊಂಡಿದ್ದರು.