ಫ್ರೆಂಡ್​ಶಿಪ್​ ಕ್ಲಬ್​ ಹೆಸರಲ್ಲಿ ಆನ್​ಲೈನ್​ ವಂಚನೆ

ಉಡುಪಿ: ಫ್ರೆಂಡ್​ಶಿಪ್​ ಕ್ಲಬ್​ ಸದಸ್ಯತ್ವ ಪಡೆಯುವ ಆಸೆಗೆ ಬಿದ್ದ ವೃದ್ಧರೊಬ್ಬರು ಸೈಬರ್​ ವಂಚಕರ ಜಾಲಕ್ಕೆ ಸಿಲುಕಿ ಬರೋಬ್ಬರಿ 5,11,882 ರೂ. ಕಳೆದುಕೊಂಡಿರುವ ಘಟನೆ ಕಡಿಯಾಳಿಯಲ್ಲಿ ನಡೆದಿದೆ. ಕಡಿಯಾಳಿ ನಿವಾಸಿ ಉಸ್ಮಾನ್​ ಸಾಹೇಬ್​ (66) ವಂಚನೆಗೊಳಗಾದವರು. ಇವರು ತಮ್ಮ ಎಸ್​ಬಿ ಖಾತೆಯಿಂದ ಜೂನ್​ 27 ರಿಂದ ಜುಲೈ 14ರ ಅವಧಿಯಲ್ಲಿ ಹಂತ ಹಂತವಾಗಿ ಹಣವನ್ನು ವರ್ಗಾಯಿಸಿದ್ದರು. ಜೂನ್​ 27 ರಂದು 29,000 ರೂ., ಜುಲೈ 9 ರಂದು ಒಂದೇ ದಿನ ಮೂರು ಬಾರಿ 84,882 ರೂ., 99,000 ರೂ. ಹಾಗೂ 99,000 ರೂ. ಮತ್ತು ಜುಲೈ 14 ರಂದು 2,00,000 ರೂ. ಹಣವನ್ನು ಗೂಗಲ್​ ಪೇ, ಕ್ಯೂಆರ್​ ಕೋಡ್​ ಸ್ಕಾ$ನರ್​ ಹಾಗೂ ಬ್ಯಾಂಕ್​ ಖಾತೆಗಳ ಮೂಲಕ ಸೈಬರ್​ ವಂಚಕರು ಸೂಚಿಸಿದ ಖಾತೆಗಳಿಗೆ ಕಳುಹಿಸಿದ್ದರು. ನಂತರ ಆನ್​ಲೈನ್​ ವಂಚನೆಗೆ ಒಳಗಾಗಿರುವುದನ್ನು ಅರಿತ ಅವರು ಪೊಲೀಸ್​ ಠಾಣೆಯ ಮೆಟ್ಟಿಲೇರಿದ್ದಾರೆ. ನಗರ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.