ಮಕ್ಕಳ ಆಟದ ನೋಟು ತೋರಿಸಿ ವಂಚನೆಗೆ ಯತ್ನ; ಸಿಸಿಬಿ ಬಲೆಗೆ ಬಿದ್ದ ಖದೀಮರು!

ಬೆಳಗಾವಿಯಲ್ಲಿ ₹3 ಕೋಟಿ ನಗದು ನೀಡಿದರೆ ₹5 ಕೋಟಿ ಆನ್‌ಲೈನ್ ಮೂಲಕ ವರ್ಗಾವಣೆ ಮಾಡುವುದಾಗಿ ನಂಬಿಸಿ ಪರಸ್ಪರ ವಂಚಿಸಲು ಯತ್ನಿಸಿದ ನಾಲ್ವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಶಿವಲಿಂಗಯ್ಯ ಗಣಾಚಾರಿ, ಸಾಗರ ಕಿಳ್ಳಿಕೇತ, ವಿನಾಯಕ ನೋಕರೆ ಹಾಗೂ ಶಿವಾನಂದ ಮುನವಳ್ಳಿ ಬಂಧಿತ ಆರೋಪಿಗಳು. ಮಾರ್ಸ್ ಇನ್‌ಫ್ರಾ ಕಂಪನಿಯ ಹೆಸರನ್ನು ದುರ್ಬಳಕೆ ಮಾಡಿಕೊಂಡು ನಕಲಿ ಬ್ಯಾಂಕ್ ಸ್ಟೇಟ್‌ಮೆಂಟ್ ಸೃಷ್ಟಿಸಿ ಹಣ ವರ್ಗಾವಣೆ ಮಾಡುವುದಾಗಿ ಮೂವರು ಆರೋಪಿಗಳು ನಂಬಿಸಿದ್ದರು. ಮತ್ತೊಂದೆಡೆ ಶಿವಾನಂದ ಕೂಡ ₹3 ಕೋಟಿ ಇದೆ ಎಂದು ತೋರಿಸಲು ಮಕ್ಕಳ ಆಟಿಕೆ ನೋಟುಗಳನ್ನು ಅಸಲಿ ಹಣದಂತೆ ಜೋಡಿಸಿಟ್ಟಿದ್ದ. ನವೆಂಬರ್ 3ರಂದು ಬೆಳಗಾವಿಯ ಶಾಂತಿನಗರದಲ್ಲಿ ಸಿಸಿಬಿ ಪೊಲೀಸರು ದಾಳಿ ನಡೆಸಿ ಆರೋಪಿಗಳನ್ನು ಬಂಧಿಸಿದ್ದಾರೆ. ಅವರಿಂದ ನಗದು, ಏರ್ ಪಿಸ್ತೂಲ್, ಐದು ಮೊಬೈಲ್ ಹಾಗೂ ನಕಲಿ ಬ್ಯಾಂಕ್ ಸ್ಟೇಟ್‌ಮೆಂಟ್ ವಶಪಡಿಸಿಕೊಳ್ಳಲಾಗಿದೆ. ಈ ಕುರಿತು ತಿಲಕವಾಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.