ದಸರಾ ಶಾಕ್​, ಅಮೃತಸರದಲ್ಲಿ ಜನರ ಮೇಲೆ ರೈಲು ಹರಿದು 50ಕ್ಕೂ ಹೆಚ್ಚು ಸಾವು..

ಅಮೃತಸರದಲ್ಲಿ ರೈಲು ಹಳಿಗಳ ಸಮೀಪದಲ್ಲೇ ರಾವಣನ ಪ್ರತಿಕೃತಿ ದಹನ ಕಾರ್ಯಕ್ರಮವನ್ನ ಆಯೋಜಿಸಲಾಗಿತ್ತು. ಈ ವೇಳೆ ಹಳಿಗಳ ಪಕ್ಕದಲ್ಲಿ ಜಮಾಯಿಸಿದ್ದ ನೂರಾರು ಜನರ ಮೇಲೆ ಟ್ರೈನ್​ ಹರಿದಿದ್ದು, 50ಕ್ಕೂ ಹೆಚ್ಚು ಮಂದಿ ಅಸುನೀಗಿದ್ದಾರೆ ಎನ್ನಲಾಗಿದೆ. ಅಲ್ಲದೆ, 500 ಕ್ಕೂ ಹೆಚ್ಚು ಜನ ಗಾಯಗೊಂಡಿರುವ ಸಾಧ್ಯತೆಯಿದೆ. ಒಟ್ಟಿನಲ್ಲಿ ರಾವಣ ದಹನ ಕಾರ್ಯಕ್ರಮ ದೇಶಕ್ಕೆ ದೊಡ್ಡ ಶಾಕ್​​ ಅನ್ನ ಕೊಟ್ಟಿದೆ.ರಾವಣ ದಹನ ಕಾರ್ಯಕ್ರಮ ವೇಳೆ ಪಟಾಕಿ, ಬಾಣ ಬಿರುಸುಗಳು ಸಿಡಿದು, ಭಾರಿ ಸದ್ದು ಉಂಟಾಗಿತ್ತು. ಹಾಗಾಗಿ ರೈಲ್ವೆ ಹಳಿ ಮೇಲೆ ನಿಂತಿದ್ದ ಭಾರಿ ಜನಸ್ತೋಮಕ್ಕೆ ಟ್ರೈನ್​ ಬರುತ್ತಿರುವುದು ಕೇಳಿ ಬಂದಿಲ್ಲ. ಹಾಗಾಗಿ ಈ ಅಪಘಾತ ಸಂಭವಿಸಿದೆ. ಟ್ರೈನು ಜಲಂಧರ್​​ನಿಂದ ಅಮೃತಸರದತ್ತ ಬರುತ್ತಿತ್ತು. ಮಾನಾವಲ ನಿಲ್ದಾಣದ ಸಮೀಪ ಗೇಟ್​ ನಂಬರ್​ 27ರ ಬಳಿ DMU ಟ್ರೈನ್​ ನಂಬರ್​ 74943 ಚಲಿಸುತ್ತಿದ್ದಾಗ ಈ ಅಪಘಾತವುಂಟಾಗಿದೆ ಎಂದು ಉತ್ತರ ರೈಲ್ವೆ ಮೂಲಗಳು ತಿಳಿಸಿವೆ.