ಮುಖ್ಯಮಂತ್ರಿ ಮೋದಿಯಿಂದ ಅಡಿಗಲ್ಲು, ಪ್ರಧಾನಿ ಮೋದಿಯಿಂದ ಉದ್ಘಾಟನೆ..!

2013ರಲ್ಲಿ ನರೇಂದ್ರ ಮೋದಿ ಗುಜರಾತ್​ ಮುಖ್ಯಮಂತ್ರಿಯಾಗಿದ್ದಾಗ ಸ್ಟ್ಯಾಚೂ ಆಫ್ ಯೂನಿಟಿ ನಿರ್ಮಾಣ ಯೋಜನೆಗೆ ಅಡಿಗಲ್ಲು ಹಾಕಿದ್ದರು. ಇದೀಗ ಅದು ಪೂರ್ಣ ಗೊಂಡಿದ್ದು, ಪ್ರಧಾನಿ ಮೋದಿ ಉದ್ಘಾಟನೆ ಮಾಡುತ್ತಿದ್ದಾರೆ..!ನೋಯ್ಡಾ ಮೂಲದ ಶಿಲ್ಪಿ ರಾಮ್​​​. ವಿ. ಸುತರ್​​ ಈ ಪ್ರತಿಮೆ ವಿನ್ಯಾಸಗೊಳಿಸಿದ್ದಾರೆ. ಪ್ರತಿಮೆಯು ಸರ್ದಾರ್​​ ಪಟೇಲ್​ ಅವರ ಮುಖವನ್ನು ಹೋಲಬೇಕೆಂಬ ನಿಟ್ಟಿನಲ್ಲಿ ಸುತರ್​ ಅವರು ಹೆಚ್ಚಿನ ಕಾಳಜಿ ವಹಿಸಿದ್ದರು. ಇದಕ್ಕಾಗಿ ಪಟೇಲ್​ರ ಸುಮಾರು 2 ಸಾವಿರ ಫೋಟೋಗಳನ್ನ ಅಧ್ಯಯನ ಮಾಡಿದ್ದರು. ಸರ್ದಾರ್​ ಪಟೇಲ್​​ರನ್ನ ನೇರವಾಗಿ ನೋಡಿದ್ದ ಇತಿಹಾಸಕಾರರು ಹಾಗು ಜನರನ್ನು ಕೂಡ ಭೇಟಿ ಮಾಡಿದ್ದರು. ಈ ಪ್ರತಿಮೆಯನ್ನ ದೂರದಿಂದ ನೋಡಿದರೆ ಸರ್ದಾರ್​ ಪಟೇಲ್​ ಅವರು ನೀರಿನಲ್ಲಿ ನಡೆದುಕೊಂಡು ಸರ್ದಾರ್​ ಸರೋವರ್​ ಡ್ಯಾಮ್​​ನತ್ತ ಬರುತ್ತಿರುವಂತೆ ಕಾಣುತ್ತದೆ.ಸುಮಾರು ₹2,989 ಕೋಟಿ ​​ವೆಚ್ಚದಲ್ಲಿ ಎಲ್​&ಟಿ ಸಂಸ್ಥೆ ಸರ್ದಾರ್​ ಪಟೇಲ್​​ರ ಪ್ರತಿಮೆಯನ್ನ ನಿರ್ಮಾಣ ಮಾಡಿದೆ. ಇದಕ್ಕಾಗಿ 1700 ಟನ್​ ಕಂಚು ಬಳಸಲಾಗಿದೆ. ಹಾಗೇ 1850 ಟನ್ ಕಂಚಿನಿಂದ ಪ್ರತಿಮೆ ಮೇಲೆ ಲೇಪನ ಮಾಡಲಾಗಿದೆ. ಪ್ರತಿಮೆಯ ಒಳಭಾಗ ಕಾಂಕ್ರೀಟ್​​ ಸಿಮೆಂಟ್, ಸ್ಟೀಲ್​​ ಹಾಗೂ ಸ್ಟ್ರಕ್ಚರ್ಡ್​​ ಸ್ಟೀಲ್​​ನಿಂದ ಕೂಡಿದೆ. ಒಂದು ವೇಳೆ ನೀವು 5.6 ಅಡಿ ಎತ್ತರವಿದ್ದರೆ ಈ ಪ್ರತಿಮೆ ನಿಮಗಿಂತ 100 ಪಟ್ಟು ದೊಡ್ಡದಾಗಿದೆ. ಅಲ್ಲಿಗೆ ಈ ಪ್ರತಿಮೆ ಎಷ್ಟು ಎತ್ತರದ್ದು ಎಂದು ನೀವು ಊಹಿಸಬಹುದು.​​ಇನ್ನು ಈ ಪ್ರತಿಮೆ ನಿರ್ಮಾಣಕ್ಕೆ ಸಾಕಷ್ಟು ಸವಾಲುಗಳಿದ್ದವು. ಪ್ರತಿಮೆಯ ಎತ್ತರವೊಂದೇ ಅಲ್ಲ, ನರ್ಮದಾ ನದಿಯ ಮಧ್ಯೆ, ಅದೂ ನಡೆದುಕೊಂಡು ಬರುತ್ತಿರುವ ಪೋಸ್​ನಲ್ಲಿ ಪ್ರತಿಮೆ ನಿರ್ಮಾಣ ಮಾಡುವುದೇ ದೊಡ್ಡ ಸವಾಲಾಗಿತ್ತು. ಇದೀಗ ಎಲ್ಲಾ ಸವಾಲುಗಳನ್ನ ದಾಟಿ ಪ್ರತಿಮೆ ಲೋಕಾರ್ಪಣೆಗೆ ಸಿದ್ಧವಾಗಿದೆ. ಗಂಟೆಗೆ 180 ಕಿ.ಮೀ ವೇಗದಲ್ಲಿ ಗಾಳಿ ಬೀಸಿದರೂ, 6.5 ತೀವ್ರತೆಯ ಭೂಕಂಪ ಸಂಭವಿಸಿದರೂ ಅದನ್ನು ತಡೆಯುವ ಸಾಮರ್ಥ್ಯ ಈ ‘ಉಕ್ಕಿನ ಮನುಷ್ಯ’ನ ಪ್ರತಿಮೆಗೆ ಇದೆ ಎನ್ನುವುದು ಭಾರತದ ಮತ್ತೊಂದು ಹೆಮ್ಮೆ.