ನಕಲಿ ಮಹಿಳಾ IFS​ ಅಧಿಕಾರಿ ಅರೆಸ್ಟ್, ಬೆಚ್ಚಿ ಬೀಳಿಸುತ್ತೆ ಐನಾತಿಯ ಅಸಲಿ ಕಹಾನಿ…

ನೊಯಿಡಾ: ಯುಪಿಎಸ್​ಸಿ ಪರೀಕ್ಷೆಯಲ್ಲಿ ಉತ್ತೀರ್ಣಗೊಳ್ಳಲು, ಆಕಾಂಕ್ಷಿಗಳು ಹಗಲು ರಾತ್ರಿಯೆನ್ನದೇ ಓದುತ್ತಾರೆ. ಇಷ್ಟೆಲ್ಲ ಓದಿದ್ರೂ ಯುಪಿಎಸ್​ಸಿ ಪರೀಕ್ಷೆ ಪಾಸ್​ ಆಗೋದು ಸುಲಭದ ಮಾತಲ್ಲ. ಆದರೆ, ಇಲ್ಲೊಬ್ಬ ಮಹಿಳೆ ತಾನು ಅಮೆರಿಕಾದಲ್ಲಿ ಐಎಫ್​ಎಸ್​ ಅಧಿಕಾರಿ ಅಂತಾ ಹೇಳಿಕೊಂಡು ಓಡಾಡ್ತಿದ್ದಳು, ಆಕೆಯನ್ನ ಗ್ರೇಟರ್​ ನೊಯಿಡಾ ಪೊಲೀಸರು ಬಂಧಿಸಿದ್ದಾರೆ.ಝೊಯಾ ಖಾನ್​(34) ಮತ್ತು ಈಕೆಯ ಪತಿ ಹರ್ಷಲ್​ ಪ್ರತಾಪ್​ ಸಿಂಗ್​ (36) ಪೊಲೀಸರ ಬಲೆಗೆ ಬಿದ್ದ ಆರೋಪಿಗಳು. ಹಲವು ತಿಂಗಳುಗಳಿಂದ ನಕಲಿ ದಾಖಲೆಗಳನ್ನ ಸೃಷ್ಠಿಸಿ ಸೀನಿಯರ್​ ಆಫೀಸರ್​ ಎಂದು ಹೇಳಿಕೊಂಡು ಯುಪಿಯ ಘಾಜಿಯಾಬಾದ್, ಮೀರಟ್​, ಅಲಿಗಢ​, ಮೊರದಾಬಾದ್​ ಸೇರಿ ಹರಿಯಾಣದ ಗುರುಗ್ರಾಮ​ ನಗರಗಳಲ್ಲಿ ಓಡಾಡುತ್ತಿದ್ದರು.
ಈಗಾಗಲೇ ಆರೋಪಿಗಳಿಂದ 2 ಕಾರು ಜಪ್ತಿ ಮಾಡಲಾಗಿದೆ. ಅಲ್ಲದೇ ಎರಡೂ ಕಾರಿನ ಮೇಲೂ ಯುನೈಟೆಡ್ ನೇಷನ್​ ಎಂಬ ಲೋಗೊ ಹಾಕಿಕೊಂಡಿದ್ದರು ಎಂದು ತಿಳಿದು ಬಂದಿದೆ. ಅಲ್ಲದೇ 2 ಲ್ಯಾಪ್​ಟಾಪ್​, 2 ವಾಕಿ ಟಾಕಿ, ನಕಲಿ ಪಿಸ್ತೂಲ್​ ಕೂಡ ಸೀಜ್​ ಮಾಡಲಾಗಿದೆ ಅಂತ​ ನೊಯಿಡಾದ ಬಿಸ್ರಾಖ್​ ಠಾಣೆಯ ಅಧಿಕಾರಿ ವೈಭವ್​ ಕೃಷ್ಣ ಮಾಹಿತಿ ನೀಡಿದ್ದಾರೆ.
ಅಲ್ಲದೇ ಅಮೆರಿಕಾದ ವಾಷಿಂಗ್ಟನ್​ನಲ್ಲಿ ನ್ಯೂಕ್ಲಿಯರ್​​ ಪಾಲಿಸಿ ಆಫೀಸರ್​ ಆಗಿ ಕಾರ್ಯನಿರ್ವಹಿಸುತ್ತಿರೋ ಹಾಗೆ, ಯುಎನ್​ ಸೆಕ್ಯೂರಿಟಿ ಕೌನ್ಸಿಲ್​ನ ಫೇಕ್​ ಐಡಿ ಮಾಡಿಸಿಕೊಂಡಿದ್ದರು. ಅಲ್ಲದೇ ಮಹಿಳೆ ಯುಎನ್​ ಸೆಕ್ಯೂರಿಟಿ ಕೌನ್ಸಿಲ್​ ಹೆಸರಿನಲ್ಲಿ ಇ-ಮೇಲ್​​ ಕೂಡ ಕ್ರಿಯೇಟ್​ ಮಾಡಿಕೊಂಡಿದ್ದರು. ಇದರಿಂದ ಸಂಬಂಧಪಟ್ಟ ಆಯಾ ಜಿಲ್ಲಾ ಪೊಲೀಸರಿಗೆ ಇ-ಮೇಲ್​ ಮಾಡ್ತಿದ್ದರು ಎಂದಿದ್ದಾರೆ.
ವಂಚನೆ ಮಾಡಿರುವ ಮಹಿಳೆ ರಾಜ್ಯಶಾಸ್ತ್ರ ವಿಷಯದಲ್ಲಿ ಎಂಎ ಪದವಿ ಪಡೆದಿದ್ದು, ತನ್ನ ಗಂಡ ಎಸ್​ಬಿಐ ಬ್ಯಾಂಕ್​ ಪಿಒ ಉದ್ಯೋಗಸ್ಥನಾಗಿದ್ದ. ಬ್ಯಾಂಕ್​ ಪಿಒ ಕೆಲಸ ಬಿಟ್ಟು ಸಿವಿಲ್ ಸರ್ವಿಸ್​ ತಯಾರಿ ನಡೆಸುತ್ತಿದ್ದ ಎನ್ನಲಾಗಿದೆ. ಸದ್ಯ ಇಬ್ಬರನ್ನೂ ಸರ್ಕಾರಿ ವಂಚನೆ ಆರೋಪದಡಿ ಪೊಲೀಸರು ವಶಕ್ಕೆ ಪಡೆದಿದ್ದು, ವಿಚಾರಣೆಗೆ ಒಳಪಡಿಸಿದ್ದಾರೆ.