ಬಿರಿಯಾನಿ ಪಾತ್ರೆಯಲ್ಲಿತ್ತು ತುಂಡರಿಸಿದ ಮಹಿಳೆಯ ದೇಹದ ಭಾಗಗಳು: ಬೆನ್ನತ್ತಿದ ಪೊಲೀಸರಿ ಸಿಕ್ಕಿದ್ದು ಚೆನ್ನೈ ‘ಹಾರರ್ ಹೌಸ್’!

ಆಗ್ರಾದಲ್ಲಿ ರೈಲಿನಲ್ಲಿ ಪತ್ತೆಯಾದ ಕೆಂಪು ಸೂಟ್‌ಕೇಸ್‌ನಲ್ಲಿದ್ದ ಮಹಿಳೆಯ ತುಂಡರಿಸಿದ ದೇಹದ ಪ್ರಕರಣದ ತನಿಖೆ ಇದೀಗ ಚೆನ್ನೈವರೆಗೆ ತಲುಪಿದೆ. ಸಿಸಿಟಿವಿ ದೃಶ್ಯಾವಳಿಗಳ ಆಧಾರದ ಮೇಲೆ ಪೊಲೀಸರು ಗುಡುವಂಚೇರಿಯ ಬಾಡಿಗೆ ಮನೆಯೊಂದನ್ನು ಪತ್ತೆಹಚ್ಚಿದ್ದು, ಅಲ್ಲಿಯೇ ಮಹಿಳೆಯನ್ನು ಹತ್ಯೆ ಮಾಡಿರುವ ಶಂಕೆ ವ್ಯಕ್ತವಾಗಿದೆ. ಆಗಸ್ಟ್ 6ರಂದು ಆಗ್ರಾ ಕ್ಯಾಂಟ್ ರೈಲು ನಿಲ್ದಾಣದಲ್ಲಿ ತಮಿಳುನಾಡು ಎಕ್ಸ್‌ಪ್ರೆಸ್‌ನ ಜನರಲ್ ಬೋಗಿಯಲ್ಲಿ ಸೂಟ್‌ಕೇಸ್ ಪತ್ತೆಯಾಗಿತ್ತು. ಅದರೊಳಗಿನ ‘ಚೆನ್ನೈ’ ಎಂದು ಬರೆದಿದ್ದ ಚೀಲದ ಸುಳಿವಿನಿಂದ ತನಿಖೆ ಮುಂದುವರಿದಿದ್ದು, ಚೆನ್ನೈ ಸೆಂಟ್ರಲ್‌ನ ಸಿಸಿಟಿವಿಯಲ್ಲಿ ಓರ್ವ ಪುರುಷ ಹಾಗೂ ಮಹಿಳೆ ಸೂಟ್‌ಕೇಸ್ ಹೊತ್ತು ರೈಲಿಗೆ ತೆರಳಿರುವುದು ಪತ್ತೆಯಾಗಿದೆ. ಗುಡುವಂಚೇರಿ ಮನೆಯಲ್ಲಿ ಮಹಿಳೆಯನ್ನು ಕೊಂದು, ಬಳಿಕ ದೇಹವನ್ನು ತುಂಡರಿಸಿ ವಿಲೇವಾರಿಗೆ ಸಿದ್ಧಪಡಿಸಿರುವ ಸಾಧ್ಯತೆ ಇದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಬಿರಿಯಾನಿ ತಯಾರಿಸುವ ದೊಡ್ಡ ಪಾತ್ರೆಯೊಂದನ್ನು ವಶಕ್ಕೆ ಪಡೆದು ವಿಧಿವಿಜ್ಞಾನ ಪರೀಕ್ಷೆಗೆ ಕಳುಹಿಸಲಾಗಿದೆ. ಮೃತೆಯ ಗುರುತು ಹಾಗೂ ಆರೋಪಿಗಳ ಪತ್ತೆಗೆ ಚೆನ್ನೈ ಮತ್ತು ಉತ್ತರ ಪ್ರದೇಶ ಪೊಲೀಸರು ಜಂಟಿಯಾಗಿ ತನಿಖೆ ನಡೆಸುತ್ತಿದ್ದಾರೆ.