ಪಾಕ್​ನಿಂದ ಅಕ್ರಮವಾಗಿ ಭಾರತಕ್ಕೆ ಸಾಗಿಸುತ್ತಿದ್ದ 532 ಕೆ.ಜಿ. ಹೆರಾಯಿನ್​ ವಶ.‌

ಅಮೃತಸರ: ಪಾಕಿಸ್ತಾನದಿಂದ ವ್ಯಾಪಾರದ ಮಾರ್ಗದಲ್ಲಿ ಭಾರತಕ್ಕೆ ತರಲಾಗುತ್ತಿದ್ದ ದಾಖಲೆಯ 2,700 ಕೋಟಿ ರೂ. ಮೌಲ್ಯದ 532 ಕೆ.ಜಿ. ಹೆರಾಯಿನ್​ ಅನ್ನು ಅಟ್ಟಾರಿ ಗಡಿಯಲ್ಲಿ ಸೀಮಾ ಸುಂಕ ವಿಭಾಗದ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.ಪಾಕಿಸ್ತಾನದಿಂದ ಭಾರತಕ್ಕೆ ತರಲಾಗುತ್ತಿದ್ದ ರಾಕ್​ ಸಾಲ್ಟ್​ನ ನೂರಾರು ಚೀಲಗಳ ನಡುವೆ ಮಾದಕವಸ್ತುಗಳಿದ್ದ ಚೀಲಗಳನ್ನು ಬಚ್ಚಿಡಲಾಗಿತ್ತು. ಜತೆಗೆ ಇನ್ನೂ 52 ಕೆಜಿ ತೂಕದ ಒಂದು ಚೀಲ ಸಿಕ್ಕಿದೆ. ಇದರಲ್ಲಿರುವ ಮಿಶ್ರಣದ ಬಗ್ಗೆ ಅನುಮಾನವಿರುವ ಕಾರಣ ಅದನ್ನು ಪರಶೀಲನೆಗೆ ಒಪ್ಪಿಸಲಾಗಿದೆ ಎಂದು ಸೀಮಾ ಸುಂಕದ (ತಡೆ) ಆಯುಕ್ತ ದೀಪಕ್​ ಕುಮಾರ್​ ಗುಪ್ತಾ ತಿಳಿಸಿದ್ದಾರೆ.ಭಾರತದ ಸೀಮಾ ಸುಂಕದ ಇತಿಹಾಸದಲ್ಲೇ ಗರಿಷ್ಠ ಪ್ರಮಾಣದ ಮಾದಕವಸ್ತುವನ್ನು ವಶಪಡಿಸಿಕೊಂಡಿರುವ ಮೊದಲ ಪ್ರಕರಣ ಇದಾಗಿದೆ. ಶನಿವಾರ ಮಧ್ಯಾಹ್ನ 1.30ರಲ್ಲಿ ಪಾಕಿಸ್ತಾನದಿಂದ ಬಂದ ಟ್ರಕ್​ ಅನ್ನು ಪರಿಶೀಲಿಸಲಾಯಿತು. ಅದರಲ್ಲಿ 600 ಚೀಲಗಳಲ್ಲಿ ರಾಕ್​ ಸಾಲ್ಟ್​ ಅನ್ನು ಸಾಗಿಸಲಾಗುತ್ತಿತ್ತು. ಇದರ ಮಧ್ಯದಲ್ಲಿದ್ದ ಒಂದು ಚೀಲದಲ್ಲಿ ಬಿಳಿ ಬಣ್ಣದ ಪುಡಿ ಕಾಣಿಸಿತು. ತಕ್ಷಣವೇ ಅದನ್ನು ಪರಿಶೀಲಿಸಿದಾಗ ಅದು ಹೆರಾಯಿನ್​ ಎಂಬುದು ಸ್ಪಷ್ಟವಾಯಿತು. ಇಂತಹ ವಸ್ತು ಇದ್ದ 15 ಚೀಲಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈ ರೀತಿ ಸಂಘಟಿತವಾಗಿ ಅಂತಾರಾಷ್ಟ್ರೀಯ ಮಟ್ಟದ ಮಾದಕವಸ್ತು ಕಳ್ಳಸಾಗಾಣಿಕೆಯನ್ನು ಪತ್ತೆ ಹಚ್ಚಲಾಯಿತು ಎಂದು ವಿವರಿಸಿದ್ದಾರೆ.