ಕಣಿವೆ ರಾಜ್ಯದಲ್ಲಿ ಬರೋಬ್ಬರಿ 13 ವರ್ಷಗಳ ಬಳಿಕ ಸ್ಥಳೀಯ ಚುನಾವಣೆ…

ಶ್ರೀನಗರ: ಬರೋಬ್ಬರಿ 13 ವರ್ಷಗಳ ಬಳಿಕ ಕಣಿವೆ ರಾಜ್ಯ ಜಮ್ಮುಕಾಶ್ಮೀರದಲ್ಲಿ ಇಂದು ಮೊದಲ ಹಂತದ ಸ್ಥಳೀಯ ಸಂಸ್ಥೆಗಳ ಚುನಾವಣೆ ನಡೆಯುತ್ತಿದೆ. ರಾಜ್ಯದ 422 ಕಡೆ 1100 ಮುನ್ಸಿಪಾಲಿಟಿ ವಾರ್ಡ್​ಗಳಿಗೆ ಚುನಾವಣೆ ನಡೆಯುತ್ತಿದೆ. ಈ ಚುನಾವಣೆ ಪ್ರಾದೇಶಿಕ ಪಕ್ಷಗಳಾದ ನ್ಯಾಷನಲ್​ ಕಾನ್ಫರೆನ್ಸ್​​ ಹಾಗೂ ಮುಫ್ತಿ ಅವರ ಪಿಡಿಪಿ(ಪೀಪಲ್ಸ್ ಡೆಮಾಕ್ರೆಟಿಕ್​​​ ಪಾರ್ಟಿ)ಗೆ ಮಹತ್ವದ್ದಾಗಿದೆ. ನಾಲ್ಕು ಹಂತದಲ್ಲಿ ನಡೆಯುವ ಚುನಾವಣೆಯಲ್ಲಿ ಒಟ್ಟು 2990 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. ಈಗಾಗಲೇ ಇದರಲ್ಲಿ 240 ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.

ಕಾಶ್ಮೀರದ ಏಳು ಮುನ್ಸಿಪಾಲ್ಟಿಗಳು ನಮ್ಮ ಹಿಡಿತದಲ್ಲಿವೆ. ಪಕ್ಷದ 75 ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ ಎಂದು ಬಿಜೆಪಿ ತಿಳಿಸಿದೆ. ಚುನಾವಣೆಗಳು ಅಕ್ಟೋಬರ್​​ 16ಕ್ಕೆ ಮುಗಿಯಲಿವೆ. ಮತದಾನ ಬೆಳಗ್ಗೆ 7 ರಿಂದ 4 ಗಂಟೆಯವರೆಗೂ ನಡೆಯುತ್ತದೆ. ಕೊನೆಯ ಬಾರಿ 2005 ರಲ್ಲಿ ಸ್ಥಳೀಯ ಸಂಸ್ಥೆಗಳಿಗೆ ಚುನಾವಣೆ ನಡೆದಿತ್ತು. ಹಿಂದಿನ ಚುನಾವಣೆಯಲ್ಲಿ ನ್ಯಾಷನಲ್​ ಕಾನ್ಫರೆನ್ಸ್ ಹಿಡಿತ ಸಾಧಿಸಿತ್ತು.