ಭಾರತದಲ್ಲೇ ಫಸ್ಟ್​ ಟೈಂ: ಪೆಟ್ರೋಲ್​​ಗಿಂತ ಡೀಸಲ್​ ಬೆಲೆ ದುಬಾರಿ..

ಭುವನೇಶ್ವರ್​​: ಭಾರತದಲ್ಲಿ ಇದೇ ಮೊಟ್ಟ ಮೊದಲ ಬಾರಿಗೆ ಒಡಿಶಾದಲ್ಲಿ ಪೆಟ್ರೋಲ್​​​ಗಿಂತ ಡೀಸೆಲ್ ಬೆಲೆ ದುಬಾರಿಯಾಗಿದೆ. ಸಾಮಾನ್ಯವಾಗಿ ಕಡಿಮೆ ತೆರಿಗೆಯ ಕಾರಣ ಪೆಟ್ರೋಲ್​​ ಬೆಲೆಗಿಂತ ಡೀಸೆಲ್​​ ಬೆಲೆ ಕಡಿಮೆ ಇರುತ್ತದೆ. ಆದ್ರೆ ಭಾನುವಾರದಂದು ಭುವನೇಶ್ವರದಲ್ಲಿ ಡೀಸೆಲ್​​​​ ಬೆಲೆ ಪೆಟ್ರೋಲ್​​ಗಿಂತ 12 ಪೈಸೆ ಹೆಚ್ಚಾಗಿದೆ. ಪ್ರತಿ ಲೀಟರ್​ ಪೆಟ್ರೋಲ್​​ ಬೆಲೆ ₹80.57 ಇದ್ದರೆ, ಡೀಸೆಲ್​​ ಬೆಲೆ ₹80.69 ಆಗಿದೆ.ಒಡಿಶಾದಲ್ಲಿ ಡೀಸೆಲ್​ ಬೆಲೆ ಪೆಟ್ರೋಲ್​ ಬೆಲೆಯನ್ನ ಮೀರಿಸಿರುವುದು ಇದೇ ಮೊದಲು ಎಂದು ಉತ್ಕಲ್​ ಪೆಟ್ರೋಲಿಯಂ ಡೀಲರ್ಸ್​ ಅಸೋಸಿಯೇಷನ್​​​​​​ ಜೆನರಲ್​ ಸೆಕ್ರೆಟರಿ ಸಂಜಯ್​​ ಲತ್​ ಹೇಳಿದ್ದಾರೆ. ಬೇರೆ ರಾಜ್ಯಗಳಲ್ಲಿ ಪೆಟ್ರೋಲ್​​ ಹಾಗೂ ಡೀಸೆಲ್​​​ಗೆ ಬೇರೆ ಬೇರೆ ವ್ಯಾಟ್​​​ ಇದೆ. ಆದರೆ ಒಡಿಶಾದಲ್ಲಿ ಪೆಟ್ರೋಲ್, ಡೀಸೆಲ್​ ಎರಡಕ್ಕೂ 26% ವ್ಯಾಟ್​ ಇದೆ ಎಂದು ಅವರು ಹೇಳಿದ್ದಾರೆ. ಇನ್ನು ಡೀಸೆಲ್​​ ಬೆಲೆ ಹೆಚ್ಚಾಗಿರೋದ್ರಿಂದ ಡೀಸೆಲ್​​ ಮಾರಾಟ ಕೂಡ ತಗ್ಗಿದೆ ಎಂದು ಅವರು ಹೇಳಿದ್ದಾರೆ.ಡೀಸೆಲ್​​ ಬೆಲೆ ಏರಿಕೆಗೆ ಕೇಂದ್ರ ಸರ್ಕಾರದ ದೋಷಪೂರಿತ ನೀತಿಗಳೇ ಕಾರಣ ಎಂದು ಒಡಿಶಾ ಹಣಕಾಸು ಸಚಿವ ಎಸ್​​ಬಿ ಬೆಹೆರಾ ಆರೋಪಿಸಿದ್ದಾರೆ. ಡೀಸೆಲ್​ ಬೆಲೆ ಏರಿಕೆಯಿಂದ ಅಗತ್ಯ ವಸ್ತುಗಳ ಬೆಲೆ ಕೂಡ ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಅವರು ಹೇಳಿದ್ದಾರೆ.