ಸೀಟಿಗಾಗಿ ದೋಸ್ತಿ ಕುಸ್ತಿ’ಕೈ ಬಗ್ಗಿಸುತ್ತಾ ‘ತೆನೆ?

ಬೆಂಗಳೂರು: ಲೋಕಸಭಾ ಚುನಾವಣೆಗೆ‌ ದೋಸ್ತಿಗಳ ನಡುವೆ ಸೀಟು ಹಂಚಿಕೆ ವಿಚಾರದಲ್ಲಿ ಜೆಡಿಎಸ್​​​​​ಗೆ ಕಾಂಗ್ರೆಸ್ ಶರಣಾಗದಿರಲು ತೀರ್ಮಾನಿಸಿದೆ. ಕಾಂಗ್ರೆಸ್, ಜೆಡಿಎಸ್​​ ಕೇಳಿರುವ 12 ಕ್ಷೇತ್ರಗಳನ್ನ ಬಿಟ್ಟುಕೊಡದಿರಲು ನಿರ್ಧರಿಸಿದೆ. ರಾಜ್ಯದಲ್ಲಿನ 28 ಕ್ಷೇತ್ರಗಳಲ್ಲಿ 12 ಕ್ಷೇತ್ರಗಳನ್ನ ಜೆಡಿಎಸ್​​ಗೆ ಬಿಟ್ಟುಕೊಡುವುದು ಬೇಡವೆಂಬ ಅಭಿಪ್ರಾಯದಲ್ಲಿ ಕಾಂಗ್ರೆಸ್ ಮುಖಂಡರು ಇದ್ದಾರೆ. ಹಾಗಾಗಿ ಯಾವುದೇ ಕಾರಣಕ್ಕೂ ಸೀಟು ಹಂಚಿಕೆಯಲ್ಲಿ ಜೆಡಿಎಸ್​​ಗೆ ಶರಣಾಗದಿರಲು ಪಕ್ಷದೊಳಗೆ ಒತ್ತಡ ಹೆಚ್ಚಾಗಿದೆ ಎನ್ನಲಾಗುತ್ತಿದೆ.ನಮ್ಮ ಗುರಿ ಇರುವುದು ಬಿಜೆಪಿಯನ್ನ ಹೆಚ್ಚು ಸೀಟುಗಳ ಅಂತರದಿಂದ ಸೋಲಿಸುವುದು. ಹೀಗಿರುವಾಗ ಜೆಡಿಎಸ್‌ 12 ಕ್ಷೇತ್ರಗಳಿಗೆ ಬಿಗಿಪಟ್ಟು ಹಿಡಿದರೆ ಹೇಗೆ..? ಅಷ್ಟಕ್ಕೂ ಎಷ್ಟು ಕ್ಷೇತ್ರಗಳಲ್ಲಿ ಜೆಡಿಎಸ್​​ಗೆ ಶಕ್ತಿ, ನೆಲೆ ಇದೆ ಎಂಬುದು ಮುಖ್ಯವಲ್ಲವೇ..? ಹಳೇ ಮೈಸೂರು ಭಾಗ ಹೊರತುಪಡಿಸಿದರೆ ಉಳಿದಂತೆ ಆ ಪಕ್ಷಕ್ಕೆ ಗಟ್ಟಿ ನೆಲೆಯೇ ಇಲ್ಲ. ಕಾಂಗ್ರೆಸ್​​ಗೆ ಇರುವಂತೆ ಎಲ್ಲಾ 28 ಕ್ಷೇತ್ರಗಳಲ್ಲಿ ಜೆಡಿಎಸ್​​ಗೆ ಪ್ರಾಬಲ್ಯವೇ ಇಲ್ಲ. ಯಾವ ಮಾನದಂಡದ ಆಧಾರದ ಮೇಲೆ ಜೆಡಿಎಸ್​​ 12 ಕ್ಷೇತ್ರಗಳನ್ನ ಕೇಳಲಿದೆ ಎಂಬುದು ಕೈ ನಾಯಕರ ಪ್ರಶ್ನೆಯಾಗಿದೆ. ಕೊನೆ ಪಕ್ಷ 6-7 ಸೀಟುಗಳನ್ನ ಬಿಟ್ಟುಕೊಡಬಹುದೇ ಹೊರತು 12 ಕ್ಷೇತ್ರ ಕಷ್ಟಸಾಧ್ಯ ಎಂಬ ಚರ್ಚೆಯಲ್ಲಿ ಕಾಂಗ್ರೆಸ್​​​ ನಾಯಕರಿದ್ದಾರೆ. ಜೆಡಿಎಸ್‌ ವರಿಷ್ಠರು ಎಷ್ಟೇ ಒತ್ತಡ ಹಾಕಿದರೂ ಹೈಕಮಾಂಡ್​​​​ಗೆ ವಸ್ತುಸ್ಥಿತಿ ತಿಳಿಸಬೇಕು. ಈ‌ ಮೂಲಕ ಜೆಡಿಎಸ್‌ ಒತ್ತಡಕ್ಕೆ ಮಣಿಯದಂತೆ ನೋಡಿಕೊಳ್ಳಬೇಕೆಂಬ ಚರ್ಚೆಯಲ್ಲಿ ಕೈ ನಾಯಕರಿದ್ದಾರೆ. ರಾಜ್ಯ ಕೈ ನಾಯಕರಲ್ಲಿ ಸೀಟು ಹಂಚಿಕೆ ಬಗ್ಗೆ ಗಂಭೀರ ಚರ್ಚೆ ನಡೆಸುತ್ತಿದ್ದಾರೆ.