ಕಾಡುಪ್ರಾಣಿ ಬೇಟೆಗೆ ಯತ್ನಿಸಿದವರ ಸೆರೆ

ಕನಕಪುರ: ತಾಲೂಕಿನ ಚಿಕ್ಕಮುಕ್ಕೋಡ್ಲು ಹೊರವಲಯದಲ್ಲಿ ಕಾಡು ಪ್ರಾಣಿಗಳ ಬೇಟೆಗೆ ಯತ್ನಿಸುತ್ತಿದ್ದ ತಂಡದ ಮೇಲೆ ಅರಣ್ಯ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿ ಇಬ್ಬರನ್ನು ವಶಕ್ಕೆ ಪಡೆದಿದ್ದಾರೆ. ತಮಿಳುನಾಡಿನ ಅಂಚಟ್ಟಿ ಗ್ರಾಮದ ದೇವರಾಜು (33), ಕೊರೆಕಲ್​ (42) ಬಂಧಿತರು. ಜತೆಯಲ್ಲಿದ್ದ ಕೋಣಪ್ಪ (28) ಪರಾರಿಯಾಗಿದ್ದಾನೆ. ಜ.29ರ ರಾತ್ರಿ ಬೈಕ್​ನಲ್ಲಿ ಅನುಮಾನಾಸ್ಪದವಾಗಿ ಕಾಡಂಚಿನಲ್ಲಿ ತಿರುಗಾಡುತ್ತಿರುವುದನ್ನು ಕಂಡ ವನಪಾಲಕರು ಆರೋಪಿಗಳನ್ನು ತಡೆದು ವಿಚಾರಿಸಿದಾಗ ಬೇಟೆಗೆ ಬಂದಿರುವುದು ಪತ್ತೆಯಾಗಿದೆ. ಆರೋಪಿಗಳನ್ನು ವಶಕ್ಕೆ ಪಡೆದು ಮೂರು ಬೈಕ್​ ಹಾಗೂ ಬೇಟೆಗಾಗಿ ತಂದಿದ್ದ ಎರಡು ಬ್ಯಾಟರಿ, ಉರುಳು, ಎರಡು ನಾಡಬಾಂಬು, ಚೂರಿ, ವೈರರ್​, ಇತರ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಕೋಡಿಹಳ್ಳಿ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.