ಘೋರ ಕೃತ್ಯ, ಎಣ್ಣೆಗೆ ನೀರು ತರಲು ನಿರಾಕರಿಸಿದ ಬಾಲಕನಿಗೆ ಗುಂಡಿಕ್ಕಿ ಕೊಂದ ಸಂಬಂಧಿಕ!

ಉತ್ತರಪ್ರದೇಶ: ಇಲ್ಲಿನ ಕಾಸಗಂಜ್ ಜಿಲ್ಲೆಯ ಯಾಕುತ್‌ಗಂಜ್‌ ಗ್ರಾಮದಲ್ಲಿ ನಡೆದ ನಾಮಕರಣ ಸಮಾರಂಭವೊಂದು ರಕ್ತಸಿಕ್ತವಾಗಿ ಅಂತ್ಯಗೊಂಡಿದೆ. ಮದ್ಯಪಾನ ಮಾಡುತ್ತಿದ್ದ ಧನೇಶ್ ಯಾದವ್ ಎಂಬ ವ್ಯಕ್ತಿ, ಕುಡಿಯಲು ನೀರು ಕೇಳಿದಾಗ ಒಂಬತ್ತು ವರ್ಷದ ಬಾಲಕ ಯಶ್‌ಪಾಲ್ ಅದನ್ನು ತರಲು ನಿರಾಕರಿಸಿದ್ದಾನೆ. ಇದರಿಂದ ಕೆರಳಿದ ಧನೇಶ್, ತನ್ನ ಬಳಿಯಿದ್ದ ಪಿಸ್ತೂಲಿನಿಂದ ಬಾಲಕನ ಹೊಟ್ಟೆಗೆ ನೇರವಾಗಿ ಗುಂಡು ಹಾರಿಸಿದ್ದಾನೆ. ತೀವ್ರವಾಗಿ ಗಾಯಗೊಂಡಿದ್ದ ಯಶ್‌ಪಾಲ್ ಚಿಕಿತ್ಸೆ ಫಲಕಾರಿಯಾಗದೆ ಶನಿವಾರ ಅಸುನೀಗಿದ್ದಾನೆ. ಈ ಘಟನೆ ನಡೆದ ಬೆನ್ನಲ್ಲೇ ಪರಾರಿಯಾಗಿದ್ದ ಆರೋಪಿಯನ್ನು ಪೊಲೀಸರು ಖಿತೌಲಿ ಕಾಲುವೆ ಬಳಿ ಸೆರೆಹಿಡಿದಿದ್ದು, ಕೃತ್ಯಕ್ಕೆ ಬಳಸಿದ ಆಯುಧವನ್ನು ವಶಪಡಿಸಿಕೊಂಡಿದ್ದಾರೆ. ಈ ಪ್ರಕರಣದಲ್ಲಿ ಅತ್ಯಂತ ನೋವಿನ ಸಂಗತಿಯೆಂದರೆ, ಕೇವಲ ನೀರು ತರಲಿಲ್ಲ ಎಂಬ ಕ್ಷುಲ್ಲಕ ಕಾರಣಕ್ಕೆ ಮದ್ಯದ ಅಮಲಿನಲ್ಲಿದ್ದ ವ್ಯಕ್ತಿ ಅಮಾನವೀಯವಾಗಿ ಮಗುವಿನ ಪ್ರಾಣ ತೆಗೆದಿರುವುದು. ಮದ್ಯವ್ಯಸನ ಮತ್ತು ಅತಿಯಾದ ಕೋಪ ಹೇಗೆ ವಿವೇಕವನ್ನು ಮರೆಸಿ ಓರ್ವ ವ್ಯಕ್ತಿಯನ್ನು ಕ್ರೂರ ಹಂತಕನನ್ನಾಗಿ ಮಾಡುತ್ತದೆ ಎಂಬುದಕ್ಕೆ ಈ ದುರಂತವೇ ಸಾಕ್ಷಿ. ಅಮಾಯಕ ಬಾಲಕನ ಸಾವು ಇಡೀ ಸಮಾಜ ತಲೆತಗ್ಗಿಸುವಂತೆ ಮಾಡಿದೆ.