ಶಾಲಾ ಆವರಣದಲ್ಲಿ ಮದ್ಯಸೇವಿಸಿದ ನಾಲ್ವರ ಬಂಧನ

ರಾಮನಗರ: ತಾಲೂಕಿನ ಲಕ್ಕೋಜನಹಳ್ಳಿ ಸರ್ಕಾರಿ ಶಾಲೆ ಆವರಣದಲ್ಲಿ ಮದ್ಯಪಾನ ಮಾಡಿ, ಇಸ್ಪೀಟ್​ ಆಡುತ್ತಿದ್ದ ರೌಡಿಶೀಟರ್​ ಹಾಗೂ ಆತನ ಮೂವರು ಸಹಚರರನ್ನು ರಾಮನಗರ ಗ್ರಾಮಾಂತರ ಠಾಣೆ ಪೊಲೀಸರು ಶುಕ್ರವಾರ ಬಂಧಿಸಿದ್ದಾರೆ. ಲಕ್ಕೋಜನಹಳ್ಳಿ ರೌಡಿಶೀಟರ್​ ಹನುಮ ಹಾಗೂ ಸಹಚರರಾದ ಕೌಶಿಕ್​, ಭಾನುಪ್ರಕಾಶ್​, ಅನುಕುಮಾರ್​ ಬಂಧಿತರು. ಬೇಸಿಗೆ ರಜೆ ಹಿನ್ನೆಲೆಯಲ್ಲಿ ಶಾಲೆ ಬಂದ್​ ಆಗಿದೆ. ಈ ವೇಳೆ ಆರೋಪಿಗಳು ಶಾಲಾ ಆವರಣದಲ್ಲಿನ ತೆರೆದ ರಂಗಮಂದಿರದಲ್ಲಿ ಮದ್ಯ ಸೇವಿಸುತ್ತ ಇಸ್ಪೀಟ್​ ಆಡುತ್ತಿದ್ದರು. ಇದನ್ನು ಗಮನಿಸಿದ ಸ್ಥಳಿಯರೊಬ್ಬರು ಶಾಲಾ ಆವರಣದಲ್ಲಿ ಹೀಗೆಲ್ಲ ಮಾಡುವುದು ತಪ್ಪು ಎಂದು ಬುದ್ಧಿ ಹೇಳಿದಕ್ಕೆ ಧಮ್ಕಿ ಹಾಕಿದ್ದರು. ಈ ಕುರಿತು ಪ್ರಶ್ನಿಸಿದ ಶಿಕ್ಷಕರು ಹಾಗೂ ಗ್ರಾಮಸ್ಥರಿಗೂ ಬೆದರಿಸಿದ್ದರು ಎನ್ನಲಾಗಿದೆ.
ಶಾಲಾ ಆವರಣದಲ್ಲಿ ಮದ್ಯ ಸೇವಿಸುತ್ತ ಜೂಜಾಡುತ್ತಿದ್ದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದ ಬೆನ್ನಲ್ಲೇ ಎಚ್ಚೆತ್ತ ಗ್ರಾಮಾಂತರ ಠಾಣೆ ಪೊಲೀಸರು ನಾಲ್ವರನ್ನು ಬಂಧಿಸಿದ್ದಾರೆ.