ರೇಲ್ವೆ ಹಳಿಯ ಮೇಲೆ ಅಪಘಾತ – ತನ್ನ ಜೀವ ಬಲಿಕೊಟ್ಟು ಪತ್ನಿಯನ್ನು ರಕ್ಷಿಸಿದ ಪತಿ!

ಕೊಪ್ಪಳ ತಾಲೂಕಿನ ಹುಲಿಗಿ ತುಂಗಭದ್ರಾ ರೈಲ್ವೆ ಸೇತುವೆಯ ಮೇಲೆ ಪತ್ನಿಯನ್ನು ರಕ್ಷಿಸಲು ಹೋಗಿ ಪತಿ ಮೃತಪಟ್ಟ ಹೃದಯವಿದ್ರಾವಕ ಘಟನೆ ನಡೆದಿದೆ. ಹೊಸಪೇಟೆ ತಾಲೂಕಿನ ಚಿತವಾಡಗಿ ನಿವಾಸಿ ಜಗದೀಶ್ (35) ಮೃತರು. ಧಾರ್ಮಿಕ ಕಾರ್ಯಕ್ರಮಕ್ಕೆ ಬಂದಿದ್ದ ದಂಪತಿ ರೈಲ್ವೆ ಹಳಿಯ ಮೇಲೆ ನಡೆದುಕೊಂಡು ಸೇತುವೆ ದಾಟುತ್ತಿದ್ದ ವೇಳೆ ಅತಿ ವೇಗವಾಗಿ ರೈಲು ಇಂಜಿನ್ ಬಂದಿದೆ. ಅಪಾಯವನ್ನು ಗಮನಿಸಿದ ಜಗದೀಶ್ ತಮ್ಮ ಪತ್ನಿಯನ್ನು ಸುರಕ್ಷಿತ ಸ್ಥಳಕ್ಕೆ ತಳ್ಳಿ ರಕ್ಷಿಸಿದ್ದಾರೆ. ಆದರೆ ತಾವು ತಪ್ಪಿಸಿಕೊಳ್ಳುವಷ್ಟರಲ್ಲಿ ರೈಲು ಇಂಜಿನ್ ಡಿಕ್ಕಿ ಹೊಡೆದು ಸೇತುವೆಯಿಂದ ಕೆಳಗೆ ಬಿದ್ದ ಜಗದೀಶ್ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಈ ಸಂಬಂಧ ಕೊಪ್ಪಳ ರೈಲ್ವೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.