ಯಲಹಂಕ ಭಾಗದಲ್ಲಿ ನಕಲಿ ನೋಟುಗಳ ಹಾವಳಿ

ಯಲಹಂಕ: ರಾಜಾನುಕುಂಟೆ ಹಾಗೂ ದೊಡ್ಡಬಳ್ಳಾಪುರ ಭಾಗದಲ್ಲಿ ₹100 ಮತ್ತು ₹500 ಮುಖಬೆಲೆಯ ನಕಲಿ ನೋಟುಗಳ ಹಾವಳಿ ಹೆಚ್ಚಾಗಿದ್ದು, ವ್ಯಾಪಾರಿಗಳು ಹಾಗೂ ಸಾರ್ವಜನಿಕರಲ್ಲಿ ಆತಂಕ ಮೂಡಿದೆ. ಪೆಟ್ರೋಲ್‌ ಬಂಕ್‌, ತರಕಾರಿ ಹಾಗೂ ಕಿರಾಣಿ ಅಂಗಡಿಗಳಲ್ಲಿ ನಕಲಿ ನೋಟು ಚಲಾವಣೆಯಾಗುತ್ತಿದೆ. ವಹಿವಾಟಿನ ವೇಳೆ ಅಸಲಿ ನೋಟಿನಂತೆ ಕಂಡುಬರುವುದರಿಂದ ವ್ಯಾಪಾರಿಗಳಿಗೆ ತಕ್ಷಣ ಗುರುತಿಸಲು ಸಾಧ್ಯವಾಗುತ್ತಿಲ್ಲ. ಬ್ಯಾಂಕ್‌ಗೆ ಹಣ ಠೇವಣಿ ಮಾಡುವಾಗ ನಕಲಿ ನೋಟು ಎಂಬುದು ಪತ್ತೆಯಾಗುತ್ತಿದ್ದು, ಇದರಿಂದ ವ್ಯಾಪಾರಿಗಳಿಗೆ ಆರ್ಥಿಕ ನಷ್ಟವಾಗುತ್ತಿದೆ. ನಕಲಿ ನೋಟುಗಳು ಪತ್ತೆಯಾದರೆ ಬ್ಯಾಂಕ್‌ನಲ್ಲಿ ಅವುಗಳ ಮೇಲೆ ‘ನಕಲಿ’ ಎಂದು ಸೀಲ್‌ ಹಾಕಲಾಗುತ್ತದೆ. ಒಂದೇ ಬಾರಿಗೆ ಐದು ನಕಲಿ ನೋಟುಗಳು ಬಂದರೆ ಅವುಗಳನ್ನು ವಶಪಡಿಸಿಕೊಂಡು ಪೊಲೀಸರಿಗೆ ದೂರು ನೀಡಿ ಎಫ್‌ಐಆರ್‌ ದಾಖಲಿಸಲಾಗುವುದು ಎಂದು ರಾಜಾನುಕುಂಟೆ ಎಸ್‌ಬಿಐ ವ್ಯವಸ್ಥಾಪಕ ವಿಶ್ವನಾಥ್‌ ಎಚ್ಚರಿಸಿದ್ದಾರೆ.