ಎಣ್ಣೆ ಹೊಡೆಯಲು ಹೋಗಿ ಮನೆ ಮುಂದೆ ಕ್ಯಾಬ್ ಪಾರ್ಕ್; ಪ್ರಶ್ನಿಸಿದ ಮನೆ ಮಾಲೀಕನಿಗೆ ‘ನಾನ್ ಯಾರ್ ಗೊತ್ತಾ?’ ಎಂದು ಕಿರಿಕ್!

ಬೆಂಗಳೂರು: ಬಾರ್‌ಗೆ ಮದ್ಯ ಸೇವಿಸಲು ತೆರಳಿದ್ದ ಕ್ಯಾಬ್ ಚಾಲಕ ಮನೆ ಮುಂದೆ ವಾಹನ ನಿಲ್ಲಿಸಿದ್ದನ್ನು ಪ್ರಶ್ನಿಸಿದ ಮನೆ ಮಾಲೀಕನೊಂದಿಗೆ ಗಲಾಟೆ ಮಾಡಿಕೊಂಡು ಹಲ್ಲೆಗೆ ಯತ್ನಿಸಿದ ಘಟನೆ ಮಾದನಾಯಕನಹಳ್ಳಿ ಪೊಲೀಸ್ ಠಾಣಾ ವ್ಯಾಪ್ತಿಯ ಕಾಚೋಹಳ್ಳಿ ರಸ್ತೆಯಲ್ಲಿ ನಡೆದಿದೆ. ಮನೆ ಮುಂದೆ ಸುಮಾರು ಒಂದು ಗಂಟೆ ಕ್ಯಾಬ್ ನಿಂತಿದ್ದರಿಂದ ಮಾಲೀಕ ವಾಹನದಲ್ಲಿದ್ದ ನಂಬರ್‌ಗೆ ಕರೆ ಮಾಡಿ ತೆಗೆದುಕೊಂಡು ಹೋಗುವಂತೆ ಸೂಚಿಸಿದ್ದಾರೆ. ಇದರಿಂದ ಸ್ಥಳಕ್ಕೆ ಬಂದ ಚಾಲಕ ಮನೆ ಮಾಲೀಕನೊಂದಿಗೆ ವಾಗ್ವಾದ ನಡೆಸಿದ್ದು, ಬಳಿಕ ಗಲಾಟೆ ಕೈ ಕೈ ಮಿಲಾಯಿಸುವ ಹಂತಕ್ಕೆ ತಲುಪಿದೆ. ಈ ವೇಳೆ ಚಾಲಕ ಹಲ್ಲೆಗೆ ಮುಂದಾಗಿ, ‘ನಾನ್ ಯಾರ್ ಗೊತ್ತಾ?’ ಎಂದು ಧಮಕಿ ಹಾಕಿದ್ದಾನೆ ಎನ್ನಲಾಗಿದೆ. ಘಟನೆ ಸಂಬಂಧ ಪೊಲೀಸರು ಮಾಹಿತಿ ಕಲೆಹಾಕುತ್ತಿದ್ದು, ಪ್ರಕರಣದ ಕುರಿತು ಪರಿಶೀಲನೆ ನಡೆಸುತ್ತಿದ್ದಾರೆ.