‘ಮುಂದೆ ಕಳ್ಳರಿದ್ದಾರೆ, ಆಭರಣ ಕೊಡಿ’- ಪೊಲೀಸರ ಸೋಗಿನಲ್ಲಿ ಬೈಕ್ ತಡೆದು ಚಿನ್ನ ದೋಚಿದ ಖದೀಮರು!

ರಾಯಚೂರು ಜಿಲ್ಲೆಯ ಸಿಂಧನೂರು ನಗರದ ವೈಎಸ್‌ಆರ್ ಶಾಲೆ ಬಳಿ ನಕಲಿ ಪೊಲೀಸರ ಸೋಗಿನಲ್ಲಿ ಬಂದ ಇಬ್ಬರು ಖದೀಮರು ಬೈಕ್ ಸವಾರನನ್ನು ಅಡ್ಡಗಟ್ಟಿ ಚಿನ್ನಾಭರಣ ದೋಚಿದ್ದಾರೆ. ಜವಳಗೇರಾ ಗ್ರಾಮದ ಎಂ. ಅಮರೇಶ ಈ ವಂಚನೆಗೆ ಒಳಗಾದವರು. ತಾವು ಪೊಲೀಸರೆಂದು ಪರಿಚಯಿಸಿಕೊಂಡ ಆರೋಪಿಗಳು, ರಸ್ತೆಯಲ್ಲಿ ಕಳ್ಳರಿದ್ದಾರೆ ಎಂದು ನಂಬಿಸಿ ಆಭರಣಗಳನ್ನು ಸುರಕ್ಷಿತವಾಗಿ ಚೀಲದಲ್ಲಿ ಇಡುವುದಾಗಿ ಹೇಳಿದ್ದಾರೆ. ಇದನ್ನು ನಂಬಿದ ಅಮರೇಶ 2 ತೊಲೆಯ ಚಿನ್ನದ ಸರ ಹಾಗೂ 1 ತೊಲೆಯ ಉಂಗುರವನ್ನು ಅವರಿಗೆ ನೀಡಿದ್ದಾರೆ. ಆಭರಣಗಳ ಬದಲಿಗೆ ಚೀಲದಲ್ಲಿ ಕಲ್ಲುಗಳನ್ನು ಹಾಕಿ ಅಮರೇಶ ಅವರಿಗೆ ನೀಡಿ ಆರೋಪಿಗಳು ಪರಾರಿಯಾಗಿದ್ದಾರೆ. ಬಳಿಕ ವಂಚನೆ ಅರಿತ ಅವರು ನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳಿಗಾಗಿ ಶೋಧ ನಡೆಸಿದ್ದಾರೆ.