ಶಕೀಬ್​​, ಲಿಟಸ್​​ ಆರ್ಭಟಕ್ಕೆ ಬೆಚ್ಚಿದ ಕೆರಿಬಿಯನ್ಸ್​, ಬಾಂಗ್ಲಾಗೆ ಎರಡನೇ ಜಯ

ಟೌಂಟನ್​: ಶಕೀಬ್​​ ಆಲ್​​ ಹಸನ್​​ (124*) ಶತಕ ಹಾಗೂ ಲಿಟನ್​​ ದಾಸ್​​​ (94*) ಅವರ ಸ್ಫೋಟಕ ಅರ್ಧ ಶತಕ ನೆರವಿನಿಂದ ಬಾಂಗ್ಲಾದೇಶ ವಿಶ್ವಕಪ್​ನ 23ನೇ ಪಂದ್ಯದಲ್ಲಿ ವೆಸ್ಟ್​​ ಇಂಡೀಸ್​​ ಎದುರು 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು.ಇಲ್ಲಿನ ದಿ ಕಾಪರ್​​​​ ಆಸೋಸಿಯೇಷನ್​​ ಕೌಂಟಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್​​ ಮಾಡಿದ ವೆಸ್ಟ್​​ ಇಂಡೀಸ್​​ 50 ಓವರ್​ಗಳಲ್ಲಿ 8 ವಿಕೆಟ್​​ ನಷ್ಟಕ್ಕೆ 321 ರನ್​ ಗಳಿಸಿತು. ಈ ಗುರಿಯನ್ನು ಬೆನ್ನಟ್ಟಿದ ಬಾಂಗ್ಲಾ 41.3 ಓವರ್​ಗಳಲ್ಲಿ 3 ವಿಕೆಟ್​​ ನಷ್ಟಕ್ಕೆ 322 ರನ್​ ಗಳಿಸಿ ಗೆಲುವಿನ ನಗೆ ಬೀರಿತು.ಆರಂಭಿಕರಾಗಿ ಕ್ರೀಸ್​ಗೆ ಬಂದ ಬಾಂಗ್ಲಾದ ತಮೀಮ್​​​​ ಇಕ್ಬಾಲ್​​​​ (48) ಅರ್ಧ ಶತಕದಂಚಿನಲ್ಲಿ ಔಟಾದರೆ, ಸೌಮ್ಯ ಸರ್ಕಾರ್​ (29) ಹಾಗೂ ಮುಷ್ತಾಫಿಜುರ್​​ ರಹೀಮ್​​ (1) ಶೀಘ್ರ ಪೆವಿಲಿಯನ್​​ ಸೇರಿದರು. ಬಳಿಕ ಬಂದ ಶಕೀಬ್​​ ಆಲ್​​ ಹಸನ್​​​​​​ ಹಾಗೂ ಲಿಟನ್​​ ದಾಸ್​​ ಜತೆಯಾಟ ತಂಡಕ್ಕೆ ಹೆಚ್ಚಿನ ಮೊತ್ತ ನೀಡುವ ಮೂಲಕ ತಂಡ ಗೆಲುವಿನ ರೂವಾರಿಗಳಾಗಿ ಮಿಂಚಿದರು.ಶಕೀಬ್​​​ 99 ಎಸೆತಗಳಲ್ಲಿ 16 ಬೌಂಡರಿಗಳೊಂದಿಗೆ 124 ರನ್​​ನೊಂದಿಗೆ ಏಕದಿನ ವೃತ್ತಿ ಜೀವನದಲ್ಲಿ 9ನೇ ಶತಕ ದಾಖಲಿಸಿದರು. ಲಿಟನ್​​ ದಾಸ್​​​ ವೇಗವಾಗಿ ಬ್ಯಾಟಿಂಗ್​ ಮಾಡುವ ಮೂಲಕ 69 ಎಸೆತಗಳಲ್ಲಿ 4 ಸಿಕ್ಸರ್​​ ಹಾಗೂ 8 ಬೌಂಡರಿಗಳೊಂದಿಗೆ 94 ರನ್​​ ಗಳಿಸಿ ಸಂಭ್ರಮಿಸಿದರು.ಇನ್ನು ವಿಂಡೀಸ್​​ ಪರ ಬೌಲಿಂಗ್​ ಮಾಡಿದ ಆ್ಯಂಡ್ರೆ ರಸೆಲ್ ಹಾಗೂ ಒಶಾನೆ ಥಾಮಸ್​​ ತಲಾ ಒಂದು ವಿಕೆಟ್​​ ಪಡೆದರೆ, ಉಳಿದವರು ಬಾಂಗ್ಲಾ ರನ್​ ಹೊಳೆಗೆ ಕಡಿವಾಣ ಹಾಕುವಲ್ಲಿ ವಿಫಲರಾದರು.ಇದಕ್ಕೂ ಮೊದಲು ಬ್ಯಾಟಿಂಗ್​ ಮಾಡಿದ ವೆಸ್ಟ್​ ಇಂಡೀಸ್​​ ಉತ್ತಮ ಆಟವಾಡಿದರೂ ಕೊನೆಗೆ ಸೋಲಿನ ರುಚಿ ಕಾಡಿತು. ಆರಂಭಿಕರಾಗಿ ಕ್ರೀಸ್​ಗೆ ಆಗಮಿಸಿದ ಕ್ರಿಸ್​​ ಗೇಲ್​​​​ ತೀರಾ ಕಳಪೆ ಆಟದೊಂದಿಗೆ ಶೂನ್ಯಕ್ಕೆ ಔಟಾದರೆಮತ್ತೊಬ್ಬ ಆರಂಭಿಕ ಇವಿನ್​ ಲೆವಿಸ್​ (70), ಶೈ​ ಹೋಪ್​​ (96) ಹಾಗೂ ಶಿಮ್ರೋನ್​​ ಹೇಟ್ಮೆರ್​​​​​​​ (50) ಉತ್ತಮ ಆಟವಾಡಿದರು. ಬಳಿಕ ಬಂದ ನಾಯಕ ಜೇಸನ್​​ ಹೋಲ್ಡರ್​​​ (33) ಸಾಧಾರಣ ಆಟವಾಡಿದರು.ಬಾಂಗ್ಲಾ ಪರ ಬೌಲಿಂಗ್​ ಮಾಡಿದ ಮೊಹಮ್ಮದ್​​​ ಸೈಫುದ್ದೀನ್​​​​​ ಹಾಗೂ ಮುಷ್ತಾಫಿಜುರ್​​ ರಹೀಮ್​​ ತಲಾ 3 ವಿಕೆಟ್​​ ಕಬಳಿಸಿದರೆ, ಶಕೀಬ್​ ಆಲ್​​ ಹಸನ್​​ ಎರಡು ವಿಕೆಟ್​​ ತನ್ನದಾಗಿಸಿಕೊಂಡರು.