ಹರಿಯಾಣ ಗ್ಯಾಂಗ್​ ರೇಪ್​, ಸರ್ಕಾರಕ್ಕೆ ಕಪ್ಪು ಚುಕ್ಕೆ..

ಹರಿಯಾಣದ ರಾವರಿ ಎನ್ನುವ ಪ್ರದೇಶದಲ್ಲಿ ಸಿಬಿಎಸ್​​ಸಿ ವಿದ್ಯಾರ್ಥಿನಿ ಮೇಲೆ ನಡೆದ ಗ್ಯಾಂಗ್​ ರೇಪ್ ಪ್ರಕರಣ ಸಿಎಂ ಮನೋಹರ್​ ಲಾಲ್​ ಖಟ್ಟರ್ ಸರ್ಕಾರಕ್ಕೆ ಒಂದು ದೊಡ್ಡ ಕಪ್ಪು ಚುಕ್ಕೆಯಾಗಿ ಪರಿಣಮಿಸಿದೆ. ಆ ದಿನದಂದು ಮಹೆಂದ್ರಘಡ್​​ನಲ್ಲಿರುವ ಶಿಕ್ಷಣ ಸಚಿವ ರಾಮ್​ ಬಿಲಾಸ್​ ಶರ್ಮ ತಾಯಿ ವಿಧಿವಶರಾಗಿದ್ದರು. ಈ ವೇಳೆ ಸಂತಾಪ ಸೂಚಿಸಲು ಬರುತ್ತಿದ್ದ ವಿವಿಐಪಿಗಳಿಗೆ ಭದ್ರತೆಯನ್ನು ನೀಡಲು ಸ್ಥಳೀಯ ಪೊಲೀಸರು ತೆರಳಿದ್ದರು. ಇದರಿಂದ ಅತ್ಯಾಚಾರಿಗಳು ತಪ್ಪಿಸಿಕೊಳ್ಳಲು ಅನುಕೂಲವಾಯಿತು ಎಂದು ಸರ್ಕಾರ ಕಾರಣ ನೀಡಿದೆ. ಇದೇ ವಿಚಾರವಾಗಿ ಅಮಾನತುಗೊಂಡ ಎಸ್​ಐ ಹೀರಾಮಣಿ, ಸಂತ್ರಸ್ತರು ನಮ್ಮನ್ನು ಸರಿಯಾದ ಸಮಯಕ್ಕೆ ಸಂಪರ್ಕಿಸಿದ್ದರೆ, ಅತ್ಯಾಚಾರಿಗಳನ್ನು ಮಟ್ಟ ಹಾಕುತ್ತಿದ್ದೆವು ಎಂದು ಹೇಳಿದ್ದಾರೆ.

ರೇಪ್​ ಮಾಡಿದ್ದ ಮಗನ ಬಗ್ಗೆ ತಂದೆಯೇ ಮಾಹಿತಿ ನೀಡಿದ್ರೂ, ಪೊಲೀಸ್ರು ಸುಮ್ಮನಿದ್ರು..!

ಇನ್ನು ಈ ಪ್ರಕರಣದ ಆರೋಪಿ ನಿಶು ಫೋಗಾಟ್ ತಂದೆ, ರೇಪ್​ ಬಳಿಕ ಪೊಲೀಸರಿಗೆ ನಿಶು ಫೋಗಾಟ್ ಇರುವ ಸ್ಥಳದ ಬಗ್ಗೆ ಮಾಹಿತಿ ನೀಡಿದ್ರು. ಆದ್ರೆ, ಪೊಲೀಸರು ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಆರೋಪಿಸಲಾಗಿದೆ. ಘಟನೆ ನಡೆದ ಸ್ಥಳಕ್ಕೆ ಹೋದಾಗ ಪೊಲೀಸರಿಗೆ ಯಾವುದೇ ಸಕ್ಷ್ಯಾಧಾರಗಳು ಸಿಕ್ಕಿರಲಿಲ್ಲ. ಘಟನೆಯಲ್ಲಿ ಭಾಗಿಯಾದ ಆರೋಪಿ ಡಾಕ್ಟರ್​ನನ್ನು ಬಂಧಿಸಿದಾಗ ನಿಜಾಂಶ ಹೊರಬಂದಿದೆ. ಅಲ್ಲದೇ ರೇಪ್​ ನಡೆದ ಸ್ಥಳದಲ್ಲಿ ಯಾವಾಗಲೂ ಮದ್ಯದ ಪಾರ್ಟಿಯನ್ನು ಫೋಗಾಟ್ ಏರ್ಪಡಿಸುತ್ತಿದ್ದ. ಇವರು ಕುಡಿದ ಮತ್ತಿನಲ್ಲಿ ಮೈ ಮೇಲಿನ ಶರ್ಟ್​ ಬಿಚ್ಚಿ ವಿಚಿತ್ರವಾಗಿ ಡ್ಯಾನ್ಸ್​ ಮಾಡುತ್ತಿದ್ರು. ಇಂತಹ ಸಾಕಷ್ಟು ವಿಡಿಯೋಗಳನ್ನ ಫೋಗಾಟ್​ ತನ್ನ ಫೇಸ್​ಬುಕ್​ ಅಕೌಂಟ್​ನಲ್ಲಿ ಶೇರ್​ ಮಾಡಿದ್ದಾನೆ.

ಪೊಲೀಸರ ಬೇಜವಾಬ್ದಾರಿ

ರೇಪ್​ ಆಗಿದ್ದರ ಬಗ್ಗೆ ಠಾಣೆಗೆ ಕಂಪ್ಲೆಂಟ್​ ನೀಡಲು ಸಂತ್ರಸ್ತರು ಹೋದಾಗ ಮೊದಲು ರೇಪ್ ಆಗಿದೆಯೇ ಇಲ್ಲವೇ ಎಂದು ಆಸ್ಪತ್ರೆಯಲ್ಲಿ ತೋರಿಸಿ ಎಂದು ಪೊಲೀಸ್ರು ಬೇಜವಾಬ್ದಾರಿತನ ಮೆರೆದಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಬಳಿಕ ಸಂತ್ರಸ್ತರು ಅದೇ ರಾತ್ರಿ ಮ್ಯಾಜಿಸ್ಟ್ರೇಟ್​ ಬಳಿಗೆ ಹೋದಾಗ ಪೊಲೀಸರಿಗೆ ಪ್ರಕರಣ ದಾಖಲಿಸಿಕೊಳ್ಳುವಂತೆ ತಿಳಿಸಿದೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಪ್ರಕರಣದ ಅಪರಾಧ ಸ್ಥಳವನ್ನ ಉಲ್ಲೇಖಿಸಿಲ್ಲ ಮತ್ತು ಆ ಸ್ಥಳವನ್ನ ಪರಿಶೀಲನೆಯೇ ಮಾಡಿರಲಿಲ್ಲ. ಯಾವಾಗ ಈ ಘಟನೆ ಮಾಧ್ಯಮಗಳ ಮೂಲಕ ದೇಶದಾದ್ಯಂತ ಪ್ರಕಟವಾಯಿತೋ ಅವಾಗ ಪೊಲೀಸರು ಎಚ್ಚೆತ್ತುಕೊಂಡಿದ್ದಾರೆ.