ಪಾನ್​ಕಾರ್ಡ್ ಮಾಹಿತಿ ಕೊಡದ ಶಾಸಕರು, ಸಂಸದರು ಎಷ್ಟು ಮಂದಿ ಗೊತ್ತಾ?

ನವದೆಹಲಿ: ಚುನಾವಣೆ ಸಂದರ್ಭದಲ್ಲಿ ಸಲ್ಲಿಸುವ ಅಫಿಡವಿಟ್​ನಲ್ಲಿ ದೇಶದ 7 ಜನ ಸಂಸದರು ಹಾಗೂ 199 ಜನ ಶಾಸಕರು ಪಾನ್​ಕಾರ್ಡ್ ವಿವರಗಳನ್ನ ನೀಡಿಲ್ಲ ಅಂತಾ ಎಡಿಆರ್​​ ಸಂಸ್ಥೆ ಮಾಹಿತಿ ಬಿಡುಗಡೆ ಮಾಡಿದೆ. ಈ ಮಾಹಿತಿ ಪ್ರಕಾರ ಪಾನ್​ಕಾರ್ಡ್​​ ವಿವರ ಸಲ್ಲಿಸದೇ ಇರುವ ರಾಜಕಾರಣಿಗಳಲ್ಲಿ ಅತೀ ಹೆಚ್ಚು ಪ್ರಮಾಣದಲ್ಲಿ ಇರುವುದು ಕಾಂಗ್ರೆಸ್​ ಪಕ್ಷದವರು.ಅಸೋಸಿಯೇಶನ್ ಫಾರ್​​ ಡೆಮಾಕ್ರೆಟಿಕ್​​​ ರಿಫಾರ್ಮ್ಸ್​​ ಮತ್ತು ನ್ಯಾಷನಲ್​ ಎಲೆಕ್ಷನ್​ ವಾಚ್​ ಸಂಸ್ಥೆಗಳು ನಡೆಸಿದ್ದ ಸಮೀಕ್ಷೆಯಿಂದ ಈ ಬಗ್ಗೆ ತಿಳಿದುಬಂದಿದೆ. 542 ಸಂಸದರು ಹಾಗೂ 4086 ಶಾಸಕರು ಚುನಾವಣಾ ಸಂದರ್ಭದಲ್ಲಿ ಸಲ್ಲಿಸಿದ್ದ ದಾಖಲೆಗಳಲ್ಲಿ 7 ಜನ ಸಂಸದರು ಹಾಗೂ 199 ಶಾಸಕರು ಪಾನ್​ಕಾರ್ಡ್​ ವಿವರವನ್ನು ನೀಡಿಲ್ಲ. ಇನ್ನು ಕಾಂಗ್ರೆಸ್​ ಪಕ್ಷದ 51 ಶಾಸಕರು, ಬಿಜೆಪಿಯ 42 ಶಾಸಕರು ಮತ್ತು ಸಿಪಿಐಎಂನ 25 ಶಾಸಕರು ಈವರೆಗೂ ಪಾನ್​ಕಾರ್ಡ್​ ಮಾಹಿತಿ ನೀಡಿಲ್ಲ. ಅಲ್ಲದೇ 40 ವಿಧಾನಸಭಾ ಕ್ಷೇತ್ರದ ಮಿಜೋರಾಂ ರಾಜ್ಯದಲ್ಲಿ 28 ಶಾಸಕರು ಪಾನ್​ಕಾರ್ಡ್​ ಮಾಹಿತಿ ನೀಡಿಲ್ಲ. ಇತ್ತ ಜೆಡಿಯು ಹಾಗೂ ಎಐಎಡಿಎಂಕೆ ಪಕ್ಷದ ತಲಾ ಇಬ್ಬರು ಸಂಸದರು, ಕಾಂಗ್ರೆಸ್​, ಎನ್​ಸಿಪಿ ಮತ್ತು ಎಐಎಫ್​ನ ಒಬ್ಬೊಬ್ಬ ಸಂಸದರು ಪಾನ್​ ಕಾರ್ಡ್​ ಮಾಹಿತಿ ನೀಡಿಲ್ಲವಂತೆ. ​ ​