ಮಗುವಿನ ಜೀವ ಉಳಿಸಿದ ಟ್ರಾಫಿಕ್ ಪೊಲೀಸ್

ನವದೆಹಲಿ: ದೆಹಲಿ ಟ್ರಾಫಿಕ್​​​ ಪೊಲೀಸ್​ ಸಿಬ್ಬಂದಿ ನವಜಾತ ಹೆಣ್ಣುಮಗುವೊಂದನ್ನ ರಕ್ಷಿಸಿದ್ದಾರೆ. ಇಲ್ಲಿನ ಆರ್​.ಕೆ ಖನ್ನಾ ಟೆನ್ನಿಸ್​​ ಸ್ಟೇಡಿಯಂ ಬಳಿ ಪೊದೆಯೊಂದರಲ್ಲಿ ಮಗು ಪತ್ತೆಯಾಗಿತ್ತು. ಟ್ರಾಫಿಕ್​ ಪೊಲೀಸರು ಆ ಮಗುವನ್ನ ಎತ್ತಿಕೊಂಡು ಬಂದಿದ್ದು, ಮರುಜೀವ ನೀಡಿದ್ದಾರೆ.ಅಕ್ಟೋಬರ್ ​31ರಂದು ಹೆಡ್​ ಕಾನ್ಸ್​​ಟೇಬಲ್ ಅನಿಲ್ ಹಾಗೂ ಕಾನ್ಸ್​​ಟೇನಲ್​​ ಪರ್ವೀನ್​​​ ಆಫ್ರಿಕಾ ಅವೆನ್ಯೂ ರೋಡ್​​ನ ಸ್ಟೇಡಿಯಂ ಬಳಿ ಕಾರ್ಯ ನಿರ್ವಹಿಸುತ್ತಿದ್ರು. ಸಂಜೆ ಸುಮಾರು 4 ಗಂಟೆ ವೇಳೆಗೆ ಮಗುವೊಂದು ಅಳುವ ಶಬ್ದ ಕೇಳಿಸುತ್ತಿತ್ತು. ಸ್ಟೇಡಿಯಂ ಬಳಿ ಪೊದೆಯೊಂದರಿಂದ ಶಬ್ದ ಬರುತ್ತಿತ್ತು. ಅಲ್ಲದೆ ಸ್ಥಳದಲ್ಲಿ ಕೆಲವು ಬೀದಿನಾಯಿಗಳು ಓಡಾಡುತ್ತಿದ್ದುದನ್ನು ಕಂಡಿದ್ದರು. ಇದರಿಂದ ಅನುಮಾನಗೊಂಡು ಕೂಡಲೇ ಟ್ರಾಫಿಕ್​​​ ಚೆಕ್​ ಮಾಡೋದನ್ನ ನಿಲ್ಲಿಸಿ ಇಬ್ಬರೂ ಪೊದೆಯ ಬಳಿ ಧಾವಿಸಿದ್ದಾರೆ. ಅಲ್ಲಿ ನವಜಾತ ಹೆಣ್ಣುಮಗು ಪತ್ತೆಯಾಗಿದೆ. ಬಳಿಕ ದೆಹಲಿ ಪೊಲೀಸ್​ ಕಂಟ್ರೋಲ್​ ರೂಮ್​ಗೆ ಮಾಹಿತಿ ನೀಡಿ ಮಗುವನ್ನು ಸಫ್ದರ್​​​ಜಂಗ್​​ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ.ಸದ್ಯ ಮಗು ಆರೋಗ್ಯವಾಗಿದೆ. ಈ ಬಗ್ಗೆ ಸಫ್ದರ್​​ಜಂಗ್​​ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಹಾಗೇ ಮಗುವನ್ನ ಕಾಪಾಡಿದ ಟ್ರಾಫಿಕ್​​ ಪೊಲೀಸರಿಗೆ ಬಹುಮಾನವನ್ನೂ ನೀಡಲಾಗಿದೆ.