ಸಮನ್ವಿ ನೆನಪಿನಲ್ಲಿ ಗಂಡು ಮಗುವಿಗೆ ಜನ್ಮ‌ನೀಡಿದ ಅಮೃತಾ ರೂಪೇಶ್

ಅಮೃತಾ ರೂಪೇಶ್ ತಮ್ಮ‌ ಮೊದಲ ಮಗುವನ್ನು ಕಳೆದುಕೊಂಡಿದ್ದರು. ಎರಡನೇ ಮಗಳು ಸಮನ್ವಿ ಅವರ ಎಲ್ಲ ನೋವುಗಳಿಗೆ ಉತ್ತರವಾಗಿದ್ದಳು. ಕಿರುತೆರೆಯ ನಮ್ಮಮ್ಮ ಸೂಪರ್ ಸ್ಟಾರ್ ಕಾರ್ಯಕ್ರಮದ ಮೂಲಕ ಕರುನಾಡಿನ ಮನೆಮಾತಾಗಿದ್ದಳು. ಆದರೆ ದ್ವಿಚಕ್ರವಾಹನ ಅಪಘಾತದಲ್ಲ ಸಮನ್ವಿ ಇನ್ನೆಂದೂ ಬಾರದ ಲೋಕಕ್ಕೆ ತೆರಳಿದ್ದಳು. ಈ ಘಟನೆ ಅಮೃತಾ ರೂಪೇಶ್ ಅವರ ಬದುಕಿನಲ್ಲಿ ಕತ್ತಲೆ ಮೂಡಿಸಿತ್ತು.‌ ಸಮನ್ವಿ ಸಾಯುವಾಗ ಅಮೃತಾ ಎರಡು ತಿಂಗಳ ಗರ್ಭಿಣಿ ಯಾಗಿದ್ದು, ಈಗ ಸಮನ್ವಿ ಸಾವಿನ ಏಳು ತಿಂಗಳ ಬಳಿಕ ಅಮೃತಾ ಮುದ್ದಾದ ಗಂಡುಮಗುವಿಗೆ ಜನ್ಮನೀಡಿದ್ದಾರೆ.

ಈ ವಿಚಾರವನ್ನು ಸ್ವತಃ ಅಮೃತಾ ರೂಪೇಶ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ‌ ಹಂಚಿಕೊಂಡಿದ್ದಾರೆ. ನಮ್ಮ ಕಷ್ಟದ ಸಮಯದಲ್ಲಿ ನಿಮ್ಮೆಲ್ಲರ ಸಹಾಯ ಹಾಗೂ ಸಾಂತ್ವನಕ್ಕೆ ಧನ್ಯವಾದಗಳು. ಈಗ ಬದುಕು ಮತ್ತೊಂದು ಮಗ್ಗುಲಿಗೆ ಹೊರಳಿದೆ. ನಿಮ್ಮೆಲ್ಲರ ಹಾರೈಕೆಯಿಂದ ನಾನು ಹಾಗೂ ರೂಪೇಶ್ ಗಂಡುಮಗುವಿನ ಪೋಷಕರಾಗಿದ್ದೇವೆ ಎಂದಿದ್ದಾರೆ.