ಹೈಕೋರ್ಟ್ ಆದೇಶದನ್ವಯ ತೆರವು ಕಾರ್ಯಾಚರಣೆ ಮನೆ ಸಾಮಗ್ರಿಗಳನ್ನು ಹೊರಹಾಕಿ ತೆರವು

ಹುಬ್ಬಳ್ಳಿ: ಬಹಳ ದಿನಗಳಿಂದ ಜಾಗದ ಮಾಲೀಕರು ಮತ್ತು ಲೀಸ್ ಪಡೆದ ಜಾಗದಲ್ಲಿದ್ದ ನಿವಾಸಿಗಳ ನಡುವೆ ನಡೆದಿದ್ದ ತಿಕ್ಕಾಟಕ್ಕೆ ಹೈಕೋರ್ಟ್ ಅಂತ್ಯ ಹಾಡಿದ್ದು, ಈ ಮೂಲಕ ಲೀಸ್​​ನಲ್ಲಿದ್ದ ಜನರಿಗೆ ಮನೆ ಖಾಲಿ ಮಾಡುವಂತೆ ಸೂಚಿಸಿದೆ. ಇದರಿಂದ ಸುಮಾರು ವರ್ಷಗಳ‌ ಪ್ರಕರಣಕ್ಕೆ ತಾತ್ಕಾಲಿಕ ಅಂತ್ಯ ಸಿಕ್ಕಂತಾಗಿದ್ದು, ಇಂದು ಎಲ್ಲಾ ಮನೆ ಖಾಲಿ ಮಾಡಿಸಲಾಗಿದೆ.ನಗರದ ಹೊಸೂರು ಸರ್ಕಲ್ ಬಳಿಯ ಆರ್.ಬಿ.ಕುಲಕರ್ಣಿ ಚಾಳದ ವಿವಾದ ತಾತ್ಕಾಲಿಕವಾಗಿ ಅಂತ್ಯ ಕಂಡಿದೆ. ಈ ಹಿಂದೆ ಕುಲಕರ್ಣಿ ಎಂಬುವರು ಲೀಸ್​​ ಪಡೆದಿದ್ದ ಜಾಗದಲ್ಲಿ ಅನಧಿಕೃತವಾಗಿ ಮನೆ ನಿರ್ಮಾಣ ಮಾಡಿಕೊಂಡು ತೆರವಿಗೆ ವಿರೋಧ ವ್ಯಕ್ತಪಡಿಸಿದ್ದರು. ಇದರಿಂದ ಜಾಗದ ಮಾಲೀಕ ಮನೆ ತೆರವುಗೊಳಿಸಿ ಜಾಗ ನೀಡಬೇಕೆಂದು 1971ರಲ್ಲಿಯೇ ಕೋರ್ಟ್ ಮೊರೆ ಹೋಗಿದ್ದರು.
ಆದರೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಲೀಸ್​​​ದಾರರು ಮೇಲ್ಮನವಿ ಸಲ್ಲಿಸುತ್ತಾ ಬಂದಿದ್ದರು. ಆದರೆ ಇದಕ್ಕೆ ಹೈಕೋರ್ಟ್ ದ್ವಿಸದಸ್ಯ ಪೀಠ ಆದೇಶ ಹೊರಡಿಸಿ ಅಂತ್ಯ ಹಾಡಿದ್ದು, ಅಂತಿಮವಾಗಿ ಜಾಗವನ್ನು ಮಾಲೀಕರಿಗೆ ನೀಡುವಂತೆ ತಿಳಿಸಿದೆ. ಅದರಂತೆ ಇಂದು ಕುಲಕರ್ಣಿ ಚಾಳದಲ್ಲಿ ನಿರ್ಮಿಸಲಾಗಿದ್ದ 57 ಮನೆಗಳನ್ನು ಬಂದೋಬಸ್ತ್ ನಡುವೆ ತೆರವುಗೊಳಿಸಲಾಯಿತು.‌
ಇನ್ನು ಕೋರ್ಟ್​ನ ಆದೇಶ ಪಾಲಿಸಲೇಬೇಕಾದರಿಂದ ಸುಮಾರು ವರ್ಷಗಳಿಂದ ಕುಲಕರ್ಣಿ ಚಾಳದಲ್ಲಿ ಮನೆ ನಿರ್ಮಿಸಿಕೊಂಡು ಜೀವನ ನಡೆಸುತ್ತಿದ್ದ 52 ಕುಟುಂಬಗಳು ಬೀದಿಗೆ ಬಂದಿದ್ದು, ಮನೆ ಸ್ಥಳಾಂತರ ಮಾಡಲು ಸಮಯ ಬೇಕೆಂದು ಪಟ್ಟು ಹಿಡಿದಿರು. ಆದರೆ ಈ ವೇಳೆ ಅಧಿಕಾರಿಗಳು ಮತ್ತು ಬಾಡಿಗೆದಾರರಿಗೆ ಈ ಹಿಂದೆಯೇ ಕಾಲಾವಕಾಶ ನೀಡಲಾಗಿದ್ದರಿಂದ ಸರ್ಕಾರಿ ವಕೀಲರು ಮಧ್ಯ ಪ್ರವೇಶ ಮಾಡಿ ಕೋರ್ಟ್ ಆದೇಶ ಬಗ್ಗೆ ಮನವರಿಕೆ ಮಾಡಿಕೊಟ್ಟು ಮನೆಯಲ್ಲಿದ್ದ ವಸ್ತುಗಳನ್ನು ಹೊರಗೆ ಹಾಕಿ,‌ ಮನೆ ತೆರವುಗೊಳಿಸಿದರು. .