ವ್ಯಕ್ತಿಗೆ ಕಲ್ಲಿನಿಂದ ಹೊಡೆದು ಕೊಂದ ಕೋತಿಗಳು​: FIRಗೆ ಒತ್ತಾಯ.

ಭಾಗಪತ್​ : ಮನೆಯೊಳಗೆ ಮಂಗಗಳು ಬಂದಾಗ ಮನುಷ್ಯರು ಕಲ್ಲು ಎಸೆದು ಓಡಿಸುವುದು ಸಾಮಾನ್ಯ. ಆದ್ರೆ ಮಂಗಗಳೇ ಮನುಷ್ಯರಿಗೆ ಕಲ್ಲು ಹೊಡೆದರೆ ಹೇಗಿರುತ್ತೆ. ಅದ್ರಲ್ಲೂ ಮನುಷ್ಯರಿಗೇ ಕಲ್ಲು ಹೊಡೆದು ಕೊಂದಿರೋ ಉದಾಹರಣೆ ಕೇಳಿದ್ದೀರಾ..? ನೀವು ಕೇಳಿಲ್ದೇ ಇದ್ರೂ ಅಂಥದ್ದೊಂದು ಘಟನೆ ಉತ್ತರಪ್ರದೇಶದ ಭಾಗಪತ್​ನಲ್ಲಿ ನಡೆದು ಹೋಗಿದೆ. ಹೋಮ ಮಾಡಲೆಂದು ಕಟ್ಟಿಗೆ ಸಂಗ್ರಹಿಸುತ್ತಿದ್ದ 70 ವರ್ಷದ ಧರ್ಮಪಾಲ್​ ಮೇಲೆ ವಾನರ ಸೇನೆ ದಾಳಿ ಮಾಡಿವೆ. ಶಿಥಿಲಾವಸ್ಥೆಯಲ್ಲಿದ್ದ ಕಟ್ಟಡದಿಂದ ಕಲ್ಲು ಹಾಗೂ ಇಟ್ಟಿಗೆ ತುಂಡುಗಳನ್ನ ತಂದು ಮರದ ಮೇಲಿಂದ ವೃದ್ಧನಿಗೆ ಎಸೆದಿವೆ. ಪರಿಣಾಮ ತಲೆ ಮತ್ತು ಎದೆಗೆ ಗಂಭೀರವಾಗಿ ಪೆಟ್ಟು ಬಿದ್ದು ಧರ್ಮಪಾಲ್​ ಮೃತಪಟ್ಟಿದ್ದಾರೆ.ಇನ್ನು, ಪೊಲೀಸರಿಗೆ ದೂರು ನೀಡಿರುವ ಧರ್ಮಪಾಲ್​ ಮನೆಯವರು ಕೋತಿಗಳ ವಿರುದ್ಧ ಎಫ್​ಐಆರ್ ದಾಖಲಿಸುವಂತೆ ಆಗ್ರಹಿಸಿದ್ದಾರೆ. ನಮ್ಮ ಅಣ್ಣನನ್ನು ಕೋತಿಗಳು ಕೊಲೆ ಮಾಡಿವೆ. ಆದ್ರೆ ಪೊಲೀಸರು ಇದನ್ನ ಅಪಘಾತ ಅಂತ ಬಿಂಬಿಸಲು ಯತ್ನಿಸುತ್ತಿದ್ದಾರೆ. ನಾವು ಮೇಲಾಧಿಕಾರಿಗಳಿಗೆ ದೂರು ನೀಡಲಿದ್ದೇವೆ ಅಂತ ಮೃತನ ಸೋದರ ಕೃಷ್ಣಪಾಲ್ ಹೇಳಿದ್ದಾರೆ.