ದೇಶದ ಮಹಿಳೆಯರು ಹೊರ ಬರಲು ಭಯಪಡ್ತಿದ್ದಾರೆ: ರಾಹುಲ್​

ಹೈದ್ರಾಬಾದ್​: ದೇಶದಲ್ಲಿ ನಡೆಯುತ್ತಿರುವ ದಾಳಿಗಳು, ಹಾಗೂ ಲೈಂಗಿಕ ದೌರ್ಜನ್ಯಗಳಿಂದ ಮಹಿಳೆಯರು ಹೊರ ಬರಲು ಭಯಪಡುತ್ತಿದ್ದಾರೆ ಅಂತ ಕೇಂದ್ರ ಸರ್ಕಾರದ ವಿರುದ್ಧ ಎಐಸಿಸಿ ಅಧ್ಯಕ್ಷ ರಾಹುಲ್​ ಗಾಂಧಿ ಗುಡುಗಿದ್ದಾರೆ. ದೇಶದಲ್ಲಿ ಮಹಿಳೆಯರು ಭಯ ಪಡುವಂತಹ ವಾತಾವರಣ ನಿರ್ಮಾಣವಾಗಿದೆ, ಸ್ವತಂತ್ರವಾಗಿ ಓಡಾಡಲು ಆಗುತ್ತಿಲ್ಲ ಅಂತ ರಾಹುಲ್ ಗುಡುಗಿದ್ದಾರೆ.ಹೈದ್ರಾಬಾದ್​ನ ಚಾರ್​ಮಿನಾರ್​ದಲ್ಲಿ ಹಮ್ಮಿಕೊಂಡಿದ್ದ​ ರಾಜೀವ್ ಗಾಂಧಿ ಸದ್ಭಾವನಾ ಯಾತ್ರಾ ಸಮಾರಂಭದಲ್ಲಿ ಮಾತನಾಡಿದ ರಾಹುಲ್​, ಸ್ವಾತಂತ್ರ್ಯ ಹೋರಾಟಗಾರ ವಿ.ಡಿ.ಸಾವರ್ಕರ್​ರನ್ನ ಬಿಜೆಪಿ ಸರ್ಕಾರ ದೇಶ ಭಕ್ತರೆಂದೇ ಪೂಜಿಸುತ್ತಾರೆ. ಬ್ರಿಟೀಷರು ಮಹಾತ್ಮಾ ಗಾಂಧಿ ಅವರನ್ನ ಜೈಲಿಗೆ ಹಾಕಿದಾಗ ವಿ.ಡಿ. ಸಾವರ್ಕರ್ ಗಾಂಧೀಜಿಯನ್ನು ಬಿಡುಗಡೆ ಮಾಡುವಂತೆ ಆಗ್ರಹಿಸಿ​ ಬ್ರಿಟಿಷ್​ ಸರ್ಕಾರಕ್ಕೆ ಪತ್ರ ಬರೆದಿದ್ದರು. ಇಂತಹ ಮಹಾನ್​ ನಾಯಕರು ನಮ್ಮ ದೇಶಲ್ಲಿದ್ದರು. ದೇಶದಲ್ಲಿ ಸದ್ಯ ಎರಡು ರೀತಿಯ ಸಿದ್ಧಾಂತಗಳಿವೆ. ಒಂದು ದ್ವೇಷಿಸುವವರು, ಇನ್ನೊಂದು ಪ್ರೀತಿಸುವವರು. ಇವೆರಡರ ನಡುವೆ ಜಗಳ ಶುರುವಾಗಿದೆ ಎಂದು ರಾಹುಲ್​ ಕುಟುಕಿದ್ದಾರೆ. ಅಲ್ಲದೇ ದೇಶದ ಹಲವು ರಾಜ್ಯಗಳಲ್ಲಿ ಭಯದ ವಾತಾವರಣ ಸೃಷ್ಟಿಯಾಗಿದೆ ದಲಿತ ಆದಿವಾಸಿ ಮುಸ್ಲಿಂ ಜನಾಂಗದ ಮೇಲೆ ಬೆದರಿಕೆ ಹಾಕಲಾಗುತ್ತಿದೆ. ಪ್ರಧಾನಿ ದೇಶವನ್ನು ಒಡೆಯಲು ಯತ್ನಿಸುತ್ತಿದ್ದಾರೆ ಅಲ್ಲದೇ ಅವರ ಬೆಂಬಲಿಗರೂ ಕೂಡ ಅದೇ ಕೆಲಸಕ್ಕೆ ನಿಂತಿದ್ದಾರೆ ಅಂತ ರಾಹುಲ್ ಕಿಡಿಕಾರಿದ್ದಾರೆ.