ಅರ್ಜುನ್ ಸರ್ಜಾ ಇ-ಮೇಲ್, ಫೇಸ್​​ಬುಕ್​​, ಟ್ವಿಟರ್ ಖಾತೆ ಹ್ಯಾಕ್

ಬೆಂಗಳೂರು: ತನ್ನ ಇ-ಮೇಲ್‌, ಫೇಸ್​​ಬುಕ್​​​​ ಹಾಗೂ ಟ್ವಿಟರ್ ಅಕೌಂಟ್​​ ಹ್ಯಾಕ್ ಆಗಿದೆ ಎಂದು ಬಹುಭಾಷಾ ನಟ ಅರ್ಜುನ್ ಸರ್ಜಾ ಪೊಲೀಸರಿಗೆ ದೂರು ನೀಡಿದ್ದಾರೆ. ಮೀ ಟೂ ಅಭಿಯಾನದ ಹಿನ್ನೆಲೆಯಲ್ಲಿ ನಟಿ ಶೃತಿ ಹರಿಹರನ್​ ಅರ್ಜುನ್​ ಸರ್ಜಾ ಅವರ ಮೇಲೆ ಲೈಂಗಿಕ ದೌರ್ಜನ್ಯ ಆರೋಪ ಮಾಡಿರುವ ಹೊತ್ತಲ್ಲೇ ಸರ್ಜಾ ಅವರ ಇ-ಮೇಲ್​ ಹ್ಯಾಕ್ ಆಗಿರೋ ವಿಚಾರ ಬೆಳಕಿಗೆ ಬಂದಿದೆ. ಇ-ಮೇಲ್​ ಹ್ಯಾಕ್ ಮಾಡಿ ನಾನಾ ಮೇಲ್ ಕಳಿಸಲಾಗ್ತಿದೆ ಎಂದು ಅರ್ಜುನ್​ ಸರ್ಜಾ ಹೇಳಿದ್ದಾರೆ. ಈ ಹಿನ್ನೆಲೆಯಲ್ಲಿ ಅರ್ಜುನ್ ಸರ್ಜಾ, ಮ್ಯಾನೇಜರ್‌ ಮೂಲಕ ಸೈಬರ್ ಕ್ರೈಂ ಪೊಲೀಸರಿಗೆ ದೂರು ನೀಡಿದ್ದಾರೆ.ಅರ್ಜುನ್ ಸರ್ಜಾ ಅವರ ಇ-ಮೇಲ್​​, ಫೇಸ್​​ಬುಕ್ ಮತ್ತು ಟ್ವಿಟರ್​ ಖಾತೆ ಹ್ಯಾಕ್ ಮಾಡಲಾಗಿದೆ ಎಂದು ಕಮೀಷನರ್ ಸುನೀಲ್ ಕುಮಾರ್​​ಗೆ ಅರ್ಜುನ್ ಸರ್ಜಾ ಮ್ಯಾನೇಜರ್ ಶಿವಾರ್ಜುನ್​​​ ದೂರು ನೀಡಿದ್ದಾರೆ. ಕಳೆದ ಆರು ತಿಂಗಳಿಂದ ಇಮೇಲ್, ಟ್ವಿಟರ್ ಖಾತೆ ಹ್ಯಾಕ್ ಮಾಡಿ ವೈಯಕ್ತಿಕ ಮಾಹಿತಿಗಳನ್ನ ಕದ್ದಿದ್ದಾರೆ ಎಂದು ಆರೋಪಿಸಿ ಹ್ಯಾಕ್ ಮಾಡಿರುವ ದಾಖಲೆ ಮತ್ತು ಕ್ಲಿಪ್ಪಿಂಗ್ ಸಮೇತ ದೂರು ನೀಡಿದ್ದಾರೆ. ಸೈಬರ್ ಕ್ರೈಮ್ ಪೊಲೀಸರಿಗೂ ಕೂಡ ಸರ್ಜಾ ಅವರ ಮ್ಯಾನೇಜರ್​ ದೂರು ನೀಡಿದ್ದಾರೆ.