ಅರ್ಜುನ್​ ಸರ್ಜಾಗೆ ಬಂಧನ ಭೀತಿ: ನಿರೀಕ್ಷಣಾ ಜಾಮೀನಿಗೆ ಅರ್ಜಿ ಸಾಧ್ಯತೆ

ಬೆಂಗಳೂರು: ನಟಿ ಶ್ರುತಿ ಹರಿಹರನ್ #MeToo ಪ್ರಕರಣಕ್ಕೆ ಸಂಬಂಧಿಸಿದಂತೆ ಅರ್ಜುನ್ ಸರ್ಜಾಗೆ ಬಂಧನ ಭೀತಿ ಎದುರಾಗಿದೆ. ಈ ಹಿನ್ನೆಲೆಯಲ್ಲಿ ಇಂದು ಅರ್ಜುನ್ ಸರ್ಜಾ ನಿರೀಕ್ಷಣಾ ಜಾಮೀನು ಕೋರಿ ಅರ್ಜಿ ಸಲ್ಲಿಸುವ ಸಾಧ್ಯತೆ ಇದೆ.ನಗರದ ಮೇಯೋ ಹಾಲ್​ನ 22 ಸಿಸಿಹೆಚ್ ಹಾಲ್​ನಲ್ಲಿ ನ್ಯಾಯಧೀಶ ಶ್ರೀ ಬಿ.ನಾರಾಯಣಪ್ಪ ಅವರಿಂದ ಇಂದು ಮದ್ಯಾಹ್ನ 12:30ಕ್ಕೆ ವಿಚಾರಣೆ ನಡೆಯಲಿದೆ.ಸದ್ಯ ಶ್ರುತಿ ಹರಿಹರನ್​ ದೂರಿನಲ್ಲಿ ಉಲ್ಲೇಖ ಮಾಡಿದ್ದ ಸಾಕ್ಷಿಗಳಾದ ಬೋರೇಗೌಡ ಮತ್ತು ಕಿರಣ್ರನ್ನು ಪೊಲೀಸರು ಠಾಣೆಗೆ ಕರೆ ತಂದು ವಿಚಾರಣೆ ನಡೆಸುವ ಸಾಧ್ಯತೆ ಇದೆ. ಕಬ್ಬನ್ ಪಾರ್ಕ್ ಪೊಲೀಸರು ಸಿಆರ್​ಪಿಸಿ 164 ಸೆಕ್ಷನ್​ ದಾಖಲಿಸಿಕೊಂಡ ಹಿನ್ನೆಲೆಯಲ್ಲಿ ಮ್ಯಾಜಿಸ್ಟ್ರೇಟ್ ಮುಂದೆ ಖುದ್ದು ಶ್ರುತಿ ಹರಿಹರನ್ ಅವರೇ ಹಾಜರಾಗಿ ನಡೆದ ಪ್ರಕರಣ ಬಗ್ಗೆ ವಿವರಿಸಬೇಕು. ಒಂದು ವೇಳೆ ಸಿಆರ್​ಪಿಸಿ 164 ಸೆಕ್ಷನ್​ ಅಡಿಯಲ್ಲಿ ಶ್ರುತಿ ಹರಿಹರನ್ ಮ್ಯಾಜಿಸ್ಟ್ರೇಟ್​ ಮುಂದೆ ಹಾಜರಾಗಿ ಸಂಪೂರ್ಣ ಪ್ರಕರಣ ಬಿಚ್ಚಿಟ್ಟಿಲ್ಲಿ, ತನಿಖೆ ವೇಳೆ ಅಥವಾ ತನಿಖೆಯ ನಂತರ ಯಾವುದೇ ಕ್ಷಣಗಳಲ್ಲಿ ತಮ್ಮ ಹೇಳಿಕೆ ಬದಲಾಯಿಸುವಂತಿಲ್ಲ. ಹೀಗಾಗಿ ಹೇಳಿಕೆ ಬದಲು ಮಾಡದಂತೆ ಪೊಲೀಸರು ಸಿಆರ್​ಪಿಸಿ 164 ಸೆಕ್ಷನ್​ ಹಾಕಿ ಶ್ರುತಿ ಹರಿಹರನ್​ರನ್ನ ಹಾಗೂ ಪ್ರಕರಣದ ಇನ್ನಿಬ್ಬರು ಸಾಕ್ಷಿ ಬೋರೇಗೌಡ ಹಾಗೂ ಕಿರಣ್​ರನ್ನ ಹೆಚ್ಚಿನ ವಿಚಾರಣೆ ನಡೆಸುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಇಬ್ಬರೂ ಸಾಕ್ಷಿಗಳ ಸ್ವ-ಇಚ್ಛಾ ಹೇಳಿಕೆಯನ್ನು ಪೊಲೀಸರು ಪಡೆಯಲಿದ್ದಾರೆ. ಸಾಕ್ಷಿಗಳ ಹೇಳಿಕೆ ಮೇಲೆ ಅರ್ಜುನ್ ಸರ್ಜಾರ ಬಂಧನವಾಗುವ ಸಾಧ್ಯತೆ ಇದೆ.