ಅಭಿಮಾನಿಸಾಗರದ ಮಧ್ಯೆ ಅಂಬಿ ಅಂತಿಮ ಯಾತ್ರೆ ಆರಂಭ

ಬೆಂಗಳೂರು: ನಟ ಅಂಬರೀಶ್​ ಅಂತಿಮ ಯಾತ್ರೆ ಆರಂಭವಾಗಿದೆ. ಅಭಿಮಾನಿಸಾಗರದ ಮಧ್ಯೆ ನಗರದ ಕಂಠೀರವ ಸ್ಟೇಡಿಯಂನಿಂದ ವಿಶೇಷ ವಾಹನದಲ್ಲಿ ಕಂಠೀರವ ಸ್ಟುಡಿಯೋವರೆಗೂ ಅವರ ಪಾರ್ಥಿವ ಶರೀರದ ಮೆರವಣಿಗೆ ನಡೆಯಲಿದೆ. ಅಂತಿಮ ಯಾತ್ರೆಯ ವಾಹನದಲ್ಲಿ ಸುಮಲತಾ ಇದ್ದಾರೆ.ಒಟ್ಟು 13 ಕಿಲೋಮೀಟರ್​ವರೆಗೂ ಸಿಸಿಟಿವಿ ಕಣ್ಗಾವಲು ಏರ್ಪಡಿಸಲಾಗಿದೆ. ರಸ್ತೆ ಸಂಚಾರ ಸುಗಮಗೊಳಿಸಲು 4 ಡಿಸಿಪಿ, 4000 ಟ್ರಾಫಿಕ್ ಪೊಲೀಸ್ ಸಿಬ್ಬಂದಿಯನ್ನು ನಿಯೋಜನೆ ಮಾಡಲಾಗಿದೆ. ಜೊತೆಗೆ 11,000 ಪೊಲೀಸ್ ಸಿಬ್ಬಂದಿ, 30 ಕೆಎಸ್​ಆರ್​ಪಿ ತುಕಡಿಗಳನ್ನ ನಿಯೋಜನೆ ಮಾಡಲಾಗಿದೆ. ಇದಲ್ಲದೆ ಹೆಚ್ಚುವರಿಯಾಗಿ 4 ಪೊಲೀಸ್ ಕಮಿಷನರ್​ಗಳನ್ನ ಕಂಠೀರವ ಸ್ಟೇಡಿಯಂನಿಂದ, ಸ್ಟುಡೀಯೋವರೆಗೂ ನಿಯೋಜಿಸಲಾಗಿದ್ದು, ಬಿಗಿ ಪೊಲೀಸ್ ಬಂದೋಬಸ್ತ್​ ಏರ್ಪಡಿಸಲಾಗಿದೆ.