ಯೋಧ ಗುರುವಿನ ಸಮಾಧಿಗೆ ರಾಷ್ಟಧ್ವಜವಿಟ್ಟು ನಮನ ಸಲ್ಲಿಸಿದ ಪತ್ನಿ : ಫೆ. 14 ರಂದು ಉದ್ಘಾಟನೆ

ಮಂಡ್ಯ: ಗಣರಾಜ್ಯೋತ್ಸವ ದಿನ ಅಂಗವಾಗಿ
ಮೂರು ವರ್ಷದ ಹಿಂದೆ ನಡೆದ ಪುಲ್ವಾಮ ದಾಳಿಯಲ್ಲಿ ವೀರಮರಣವನ್ನಪ್ಪಿದ ಜಿಲ್ಲೆಯ ಯೋಧ ಗುರುವಿಗೆ ಮದ್ದೂರು ತಾಲೂಕಿನ ಕೆ.ಎಂ.ದೊಡ್ಡಿ ಬಳಿಯ ಮದ್ದೂರು- ಮಳವಳ್ಳಿ ರಸ್ತೆಯಲ್ಲಿ ಸಮಾಧಿ ನಿರ್ಮಾಣ ಮಾಡಲಾಗಿದ್ದು,  ಪತ್ನಿ ಕಲಾವತಿ ರಾಷ್ಟ್ರಧ್ವಜವನ್ನಿಟ್ಟು ಪೂಜೆ ಸಲ್ಲಿಸಿದ್ದಾರೆ.

ಪತಿಯ ಸಮಾಧಿಗೆ ಪೂಜೆ ಸಲ್ಲಿಸಿ ಮಾತನಾಡಿದ ಪತ್ನಿ ಕಲಾವತಿ ಅವರು, ನನ್ನ ಪತಿ ಹುತಾತ್ಮ ರಾಗಿ ಫೆಬ್ರವರಿ 14ಕ್ಕೆ 3ವರ್ಷ ತುಂಬುತ್ತಿದೆ. ಇದೇ ವೇಳೆ ಸಮಾಧಿಯನ್ನು ಉದ್ಘಾಟಿಸುವುದಾಗಿ ಶಾಸಕರಾದ ಡಿ.ಸಿ.ತಮ್ಮಣ್ಣ ಹೇಳಿದ್ದಾರೆ. ಅವರ ನೆರವಿನಿಂದ ಸಮಾಧಿ ಕೆಲಸ ಪೂರ್ಣಗೊಂಡಿದೆ ಎಂದು ಕೃತಜ್ಞತೆ ಸಲ್ಲಿಸಿದ್ದಾರೆ.

ಮೂರು ವರ್ಷದ ಬಳಿಕ ಸಮಾಧಿ ನಿರ್ಮಾಣವಾಗಿದ್ದು, ಫೆ.14ರಂದು ಉದ್ಘಾಟನೆ ನಡೆಸಲು ತೀರ್ಮಾನಿಸಲಾಗಿದೆ. ಈಗಾಗಲೇ ಈ ಸಮಾಧಿಯನ್ನು ನೋಡಲು ಜನ ಆಗಮಿಸುತ್ತಿದ್ದಾರೆ. ಕ್ಷೇತ್ರದ ಶಾಸಕ ಡಿ.ಸಿ.ತಮ್ಮಣ್ಣ ಅವರು ಈಗಾಗಲೇ ವೀಕ್ಷಣೆ ಮಾಡಿದ್ದು, ಉದ್ಘಾಟನೆಗೆ ಫೆಬ್ರವರಿ 14ರಂದು ಮುಹೂರ್ತ ನಿಗದಿ ಮಾಡಿದ್ದಾರೆ. ಕೊರೊನಾ ಹಿನ್ನಲೆಯಲ್ಲಿ ಉದ್ಘಾಟನೆಯನ್ನು ಸರಳವಾಗಿ ನಡೆಸುವುದಾಗಿ ಹೇಳಿದ್ದಾರೆ.