ಸೈಬರ್‌ ವಂಚನೆ ತಡೆ ಜಾಗೃತಿಗಾಗಿ “ಸೈಬರ್‌ ಕವಚ’

ಮಂಗಳೂರು: ಸೈಬರ್‌ ವಂಚನೆಗಳಿಂದ ಸಾರ್ವಜನಿಕರನ್ನು ಎಚ್ಚರಿಸಲು ಮಂಗಳೂರು ನಗರ ಪೊಲೀಸರು ಅಕ್ಟೋಬರ್‌ ತಿಂಗಳನ್ನು ‘ಸೈಬರ್‌ ಸುರಕ್ಷತೆ’ ಜಾಗೃತಿ ತಿಂಗಳಾಗಿ ಆಚರಿಸುತ್ತಿದ್ದು, ‘ಸೈಬರ್‌ ಕವಚ’ ಅಭಿಯಾನದ ಮೂಲಕ ಜನರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ. ಅಪರಿಚಿತ ಲಿಂಕ್‌, ಎಪಿಕೆ ಫೈಲ್‌, ಉದ್ಯೋಗದ ಆಮಿಷದ ಜಾಹೀರಾತುಗಳನ್ನು ಪರಿಶೀಲಿಸದೆ ಕ್ಲಿಕ್‌ ಮಾಡದಂತೆ ಹಾಗೂ ಬ್ಯಾಂಕ್‌, ಪೊಲೀಸ್‌ ಅಧಿಕಾರಿಗಳ ಹೆಸರಿನಲ್ಲಿ ಬರುವ ಕರೆಗಳಿಗೆ ವೈಯಕ್ತಿಕ ಮಾಹಿತಿ, ಒಟಿಪಿ, ಪಾಸ್‌ವರ್ಡ್‌ ಹಂಚಿಕೊಳ್ಳದಂತೆ ಪೊಲೀಸರು ಎಚ್ಚರಿಕೆ ನೀಡಲಿದ್ದಾರೆ. ಪ್ರತಿ ಪೊಲೀಸ್‌ ಠಾಣೆಯಲ್ಲಿ ಪ್ರತಿದಿನ ಜಾಗೃತಿ ಕಾರ್ಯಕ್ರಮಗಳ ಜತೆಗೆ ವಾಕಥಾನ್‌, ಸೈಕಲ್‌ ರ‍್ಯಾಲಿ, ರೀಲ್ಸ್‌, ಕಾರ್ಟೂನ್‌ ಮತ್ತು ಪೋಸ್ಟರ್‌ ಸ್ಪರ್ಧೆಗಳನ್ನು ಆಯೋಜಿಸಲು ಉದ್ದೇಶಿಸಲಾಗಿದೆ. ಠಾಣೆಯಿಂದ ಜನರ ಮನೆ ಬಾಗಿಲಿನವರೆಗೆ ಸೈಬರ್‌ ಸುರಕ್ಷೆಯ ಸಂದೇಶ ತಲುಪಿಸುವ ಗುರಿ ಹೊಂದಲಾಗಿದೆ ಎಂದು ನಗರ ಪೊಲೀಸ್‌ ಆಯುಕ್ತ ಸುಧೀರ್‌ ಕುಮಾರ್‌ ರೆಡ್ಡಿ ತಿಳಿಸಿದ್ದಾರೆ.