ಹವಾಲಾ ದಂಧೆ: 100 ಲಾಕರ್​​ಗಳಲ್ಲಿದ್ದ ₹25 ಕೋಟಿ ನಗದು ಜಪ್ತಿ

ನವದೆಹಲಿ: ದೆಹಲಿಯ ಚಾಂದ್ನಿ ಚೌಕ್​​ನಲ್ಲಿ ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳು, ಸುಮಾರು 100 ಖಾಸಗಿ ಲಾಕರ್​​ಗಳಲ್ಲಿದ್ದ 25 ಕೋಟಿ ಹಣವನ್ನು ಜಪ್ತಿ ಮಾಡಿದ್ದಾರೆ. ನಗರದಾದ್ಯಂತ 8 ಕಡೆ ದಾಳಿ ಮಾಡಲಾಗಿದೆ ಎಂದು ಆದಾಯ ತೆರಿಗೆ ಇಲಾಖೆಯ ಮೂಲಗಳು ತಿಳಿಸಿವೆ. ಹವಾಲಾ ದಂಧೆಕೋರರು ತಮ್ಮ ಹಣವನ್ನು ಇಡಲು ಈ ಖಾಸಗಿ ಲಾಕರ್​ಗಳನ್ನ ಬಳಸುತ್ತಿದ್ದರು ಎಂದು ಮೂಲಗಳಿಂದ ತಿಳಿದು ಬಂದಿದೆ. ರಾಷ್ಟ್ರ ರಾಜಧಾನಿ ಪ್ರದೇಶದ ಕೆಮಿಕಲ್​ ವ್ಯಾಪಾರಿಗಳು, ಡ್ರೈಫ್ರೋಟ್ಸ್​​ ಡೀಲರ್​​ಗಳು ಹಾಗೂ ತಂಬಾಕು ವ್ಯಾಪಾರಿಗಳು ಸೇರಿದಂತೆ ಕೆಲವು ಹೈ ಪ್ರೊಫೈಲ್​​​​​ ವ್ಯಕ್ತಿಗಳಿಗೆ ಸೇರಿದ ಹಣ ಇದಾಗಿದೆ ಎಂದು ಹೇಳಲಾಗಿದೆ. ಈ ಉದ್ಯಮಿಗಳು ಹವಾಲಾ ದಂಧೆಯಲ್ಲಿ ತೊಡಗಿದ್ದು, ಕೆಲವು ಇಂಟರ್​ ನ್ಯಾಷನಲ್​ ಲಿಂಕ್​ಗಳನ್ನೂ ಹೊಂದಿದ್ದಾರೆಂದು ಊಹಿಸಲಾಗಿದೆ.ಕಳೆದ ಸೆಪ್ಟೆಂಬರ್​​ನಲ್ಲಿ ಕೂಡ ದೆಹಲಿಯ ಹಲವು ಕಡೆ ಜಾರಿ ನಿರ್ದೇಶನಾಲಯ ದಾಳಿ ನಡೆಸಿತ್ತು. ಈ ವೇಳೆ ₹700 ಕೋಟಿಯ ದುಬೈ ಲಿಂಕ್​ ಹೊಂದಿದ್ದ ಹವಾಲಾ ದಂಧೆಗೆ ಸಂಬಂಧಿಸಿದಂತೆ ₹29 ಲಕ್ಷ ನಗದು ಹಾಗೂ ಕೆಲವು ದಾಖಲೆಗಳನ್ನ ಜಪ್ತಿ ಮಾಡಿತ್ತು.